ᐆᒻᒪᖅᑯᑎᑦ ᐊᒻᒪ ᑎᐊᕗᕙᑦ

ᐆᒻᒪᖅᑯᑏᑦ ᐊᕙᑎᓗ

ᐆᒻᒪᖅᑯᑎᓕᒫᑦ ᓄᓇᕗᒻᒥᑦ ᐅᖅᓱᐊᓗᒃᓴᖕᒥᖔᖃᑦᑕᖅᐳᑦ. ᐅᖅᓱᐊᓗᒃᓴᐃᑦ ᐃᑭᑕᐅᕙᒃᐳᑦ ᐆᒻᒪᖅᑯᑎᖃᖁᓪᓗᒋ ᓱᑲᓐᓇᖅᑐᓂᑦ, ᐅᖅᑰᓴᐅᒻᒧᓪᓗ, ᐊᓯᖏᓐᓄᓪᓗ ᐃᖏᕐᕋᔾᔪᑎᓄᑦ. ᑭᓯᐊᓂᓕ, ᐃᑭᑎᒃᑳᖓᑦᑎᒍᑦ ᐅᖅᓱᐊᓗᒃᓴᐃᑦ, ᓱᕈᐃᕙᓪᓕᐊᖃᑦᑕᖅᐳᒍᑦ ᐊᕙᑎᑦᑕ ᐊᕙᓗᐊᓂ, ᐱᓗᐊᖅᑐᒥᑦ ᓯᓚᕐᔪᕐᐊᑉ ᐅᔅᓯᒃᓯᕙᓪᓕᐊᔾᔪᑎᖏᓐᓂᑦ (GHGs) ᓲᕐᓗ ᓯᓚᐳᔪᕐᓗᒃ ᐃᓯᕐᓗᒃ ᐳᓪᓚᖕᓂᑯᓂᙶᖅᑐᓂ ᓄᓇᓂᙶᖅᑐᓂᑦ ᓯᓚᐅᑉ ᐅᖅᑰᓯᕙᓪᓕᐊᔪᑎᖓᓂᑦ. ᓯᓚᐅᑉ ᐅᔅᓯᒃᓯᕙᓪᓕᐊᔾᔪᑎᖏᑦ ᖃᐅᔨᒪᔭᐅᔪᑦ ᓯᓚᐅᑉ ᐃᓕᖅᑯᓯᖓᓂ ᐊᓯᔾᔨᕐᑎᕆᕙᖕᓂᖏᓐᓂ.

ᓯᓚᐅᑉ ᐊᓯᔾᔨᕐᐸᓪᓕᐊᓂᖓ, ᐊᑐᖅᐳᖅ ᑭᖑᓂᐊᒍᓪᓗ ᐊᒃᑐᐃᓂᖃᒻᒪᕆᖕᓂᐊᖅᖢᓂ ᐅᑭᐅᖅᑕᖅᑑᑉ ᐊᕙᑎᐊᓂ ᓄᓇᖃᕐᕕᒋᔭᑦᑎᓐᓂᑦ. ᖃᐅᔨᔭᐅᓯᒪᔪᑦ ᐊᓯᔾᔨᕐᓃᑦ ᐊᒥᓱᕈᖅᐸᓪᓕᐊᔪᓂ ᓯᓚᐅᑉ ᖃᓄᐃᓐᓂᖓᓂᑦ, ᓵᓐᓂᕐᓴᐅᕙᓕᖅᖢᑎᒃ ᓯᑯᑦ ᑕᕆᐅᖕᒥᑦ, ᕿᓚᒻᒥᐅᓂᖅᓴᖅ ᓱᒃᑲᓂᕐᓴᒃᑯᓪᓗ ᑐᕙᐃᔭᖅᐸᓕᖅᖢᓂ, ᐊᓯᔾᔨᕐᓂᖏᓪᓗ ᐆᒪᔪᐃᑦ ᐃᖏᕐᕋᕙᖕᓂᖏᓐᓂᑦ. ᑖᒃᑯᐊ ᐊᒃᑐᐃᓂᖃᒻᒪᕆᖕᓂᐊᖅᑐᑦ ᓄᓇᕗᒻᒥᐅᓂᑦ, ᐱᓗᐊᖅᑐᒥᑦ ᐊᖑᓇᓱᒃᑏᑦ ᐃᖃᓗᒐᓱᒃᐸᒃᑐᐃᓪᓗ ᐃᓅᓇᓱᐊᖅᖢᑎᒃ.

ᑕᒪᓐᓇ ᖃᐅᔨᑦᑎᐊᖅᖢᒍ, ᑖᒃᑯᐊ ᓄᓇᕗᑦ ᒐᕙᒪᖓᑦ ᐱᓕᕆᔪᑦ ᒥᑭᓪᓕᕚᓪᓕᑎᑦᑎᓂᖕᒥᑦ ᓯᓚᕐᔪᐊᑉ ᐅᔅᓯᒃᓯᕙᓪᓕᐊᔾᔪᑎᖏᓐᓂᑦ ᐊᖏᕈᑎᒐᓇᒃᑯᑦ ᐅᐸᓗᖓᐃᔭᐅᑎᒃᑯᓪᓗ. 2007-ᒥᑦ, ᑲᓇᑕᒥ ᓯᕗᓕᖅᑏᑦ ᑲᑎᒪᔨᖏᑎᒍ, ᓄᓇᕗᑦ ᒐᕙᒪᒃᑯᖏᑦ ᐊᑎᓕᐅᓚᐅᖅᐳᑦ ᐊᖏᕈᑎᒥ ᑕᒪᐃᓐᓅᖓᔪᓂ ᑲᓇᑕᒥ ᐊᕕᒃᑐᖅᓯᒪᔪᓕᒫᓂ ᓇᓗᓇᐃᖅᓯᓯᒪᑦᑎᐊᖅᑐᒥ ᖃᐅᔨᓇᓱᒃᓗᑎᒃ ᐊᒃᐸᕆᐊᕈᑕᐅᓂᐊᖅᑐᓂᑦ ᓯᓚᕐᔪᐊᑉ ᐅᔅᓯᒃᓯᕙᓪᓕᐊᔾᔪᑎᖏᓐᓂᑦ. ᐊᔾᔨᐸᓗᐊᓂᑦ, ᓄᓇᕗᑦ ᒐᕙᒪᒃᑯᖏᑦᑕ ᐊᐅᓚᔪᓐᓇᐅᑎᒧᑦ ᐅᐸᓗᖓᐃᔭᐅᑖ, ᐃᑯᒻᒪᑏᑦ, ᒥᑭᓪᓕᕚᓪᓕᑎᑦᑎᓇᓱᐊᖅᐳᑦ ᐊᒃᑐᐃᓂᕆᔭᒥ ᐊᕙᑎᒥᑦ ᐊᒃᐸᖅᓯᓗᑎᒃ ᐊᐅᓚᔪᓐᓇᐅᑎᓅᖅᑐᓄᑦ ᐃᓯᐊᕿᓃᑦ ᐊᒃᑐᐃᔪᑦ ᓯᓚᐅᑉ ᐊᓯᔾᔨᕐᐸᓪᓕᐊᓂᖓᓂ. ᐅᓪᓗᒥᒧᑦ, ᑖᒃᑯᐊ ᓄᓇᕗᑦ ᒐᕙᒪᒃᑯᖏᑦ ᐱᓕᕆᐊᖃᖅᓯᒪᓕᖅᐳᑦ ᑖᒃᑯᐊ ᒪᓕᑦᑎᐊᕈᒪᓪᓗᑎᔾᔪᒃ ᐊᖏᕈᑕᐅᓯᒪᔪᑦ ᐱᓕᕆᓗᑎᒃ ᓄᓇᕗᓕᒫᒥ ᓯᓚᕐᔪᐊᑉ ᐅᔅᓯᒃᓯᕙᓪᓕᐊᓂᖏᓐᓄᑦ ᑎᑎᖅᑲᓂᑦ ᖃᐅᔨᓇᓱᒃᓗᑎᒃ ᓄᓇᕘᑉ ᓯᓚᖓᑕ ᐅᔅᓯᒃᓯᕙᓪᓕᐊᓂᖏᑦ, ᐊᒃᐸᓯᒃᐸᓪᓕᐊᓗᒋᓪᓗ ᐃᓯᐊᕿᔾᔪᑕᐅᔫᑦ ᓄᓇᕗᑦ ᐆᒻᒪᖅᑯᑎᓕᕆᓂᕐᒧᑦ ᐊᐅᓚᑦᑎᔪᑎᓄᑦ ᐱᓕᕆᐊᖏᑎᒍᑦ.

ᓄᓇᕘᑉ ᓯᕗᓪᓕᖅᐹᖅ ᑎᑎᖅᑲᖏᑦ, ᐱᐊᓂᒃᑕᐅᓵᓚᐅᖅᑐᑦ ᐆᒻᒪᖅᑯᑎᓄᑦ ᑎᑎᕋᖅᑎᐊᓄᑦ, ᐊᕕᒃᑐᖅᓯᒪᕗᑦ ᓯᓚᐅᑉ ᐅᔅᓯᒃᓯᕙᓪᓕᐊᔪᑎᖏᓐᓄᑦ ᐃᓯᐊᕿᓲᑦ ᒪᓕᒃᖢᑎᒃ ᓄᓇᓕᓕᒫᓂᑦ ᐊᑐᖅᑕᐅᕙᒃᑐᑦ ᐊᐅᓚᔾᔭᐃᔾᔪᑎᓂᑦ. ᑕᐃᒪᐅᓕᐅᖕᓂᒃᑯᑦ ᖃᐅᔨᓴᐃᔾᔪᑕᐅᔪᓐᓇᖃᑦᑕᓛᖅᐳᑦ ᑕᒪᒃᑯᐊᓗ ᐊᒃᐸᓯᓕᖅᑎᑕᐅᕙᓪᓕᐊᔪᑦ ᑎᑎᕋᖅᑕᐅᕙᖕᒥᓗᑎᒃ. ᓲᕐᓗ, ᓄᓇᖤᓕᒫᒥ ᓯᓚᕐᔪᐊᑉ ᐅᔅᓯᒃᓯᕙᓪᓕᐊᔾᔪᑎᖏᑦᑕ ᐃᓯᐊᕿᓂᖏᑦ 2014-ᒥᑦ 476,776 ᑕᓐᖑᓚᐅᖅᐳᑦ ᐳᔪᕐᓗᒃ ᐃᓯᕐᓗᒥᑦ, ᑖᓐᓇᓗ 12,529 ᑕᙳᔪᖅ 2009- ᒥᖔᖅᖢᓂ.

ᓱᓕᒐᓗᐊᖅᖢᓂ ᑖᒃᑯᐊ ᓯᓚᕐᔪᐊᑉ ᐅᔅᓯᒃᓯᕙᓪᓕᐊᔾᔪᑎᖏᑕ ᐃᓯᕐᓗᖏᑦ ᐊᖏᒃᓕᕙᓪᓕᐊᖏᓐᓇᖕᒪᑕ ᖃᖓᓕᒫᖅ, ᑖᒃᑯᐊ ᓄᓇᕗᑦ ᒐᕙᒪᒃᑯᖏᑦ ᐱᓕᕆᔪᐃᑦ ᐊᒃᐸᓯᒃᐹᓪᓕᖅᑎᓐᓇᓱᐊᖅᖢᓂᔾᔪᑦ ᐃᓯᕐᓗᐃᑦ. 2008-ᒥᓂᓂᑦ, ᑖᒃᑯᐊ ᓄᓇᕗᑦ ᐄᒻᒪᖅᑯᑎᓕᕆᓂᖕᒧᑦ ᐊᐅᓚᑦᑎᔪᑎᓄᑦ ᐱᓕᕆᐊᒃᓴᓕᕆᔨᒃᑯᑦ ᓄᑖᙳᖅᑎᕆᓚᐅᖅᐳᑦ 39-ᓂᑦ ᒐᕙᒪᒃᑯᑦ ᐃᒡᓗᖁᑎᖏᓐᓂᑦ ᐃᖃᓗᖕᓂᑦ ᑕᒪᒃᑯᓂᖓ ᐊᑐᓗᐊᙱᑦᑐᓂᑦ ᐊᐅᓚᔾᔭᐃᔾᔪᑎᓂᑦ ᓲᕐᓗ ᓄᑖᓂ LED ᐃᑯᒪᓂᑦ, ᓯᕿᓂᕐᒧᑦ ᐆᓇᖅᑐᓕᐅᕈᑕᐅᔪᓐᓇᖅᑐᓂᑦ, ᓯᕿᓂᕐᒧᑦ ᓴᓂᕋᒃᑯᑦ ᐅᖅᑰᓴᐃᕙᒌᕈᑎᓂᑦ. ᑖᒃᑯᐊ ᓄᑖᙳᖅᑎᕆᓃᑦ ᓇᓚᐅᑦᑖᖅᑕᐅᓚᐅᖅᑐᑦ ᐊᒃᐸᓯᒃᐹᓪᓕᕈᑎᓂ ᐳᔪᕐᓗᖕᓂ ᐃᓱᕐᓗᖕᓂᑦ ᐃᒻᒪᖄ 1,270 ᑕᓐᓂᑦ ᐊᕐᕌᒍᑕᒫᑦ.

ᐱᓕᕆᐊᒃᓴᖅᑕᖃᐅᕐᕆᐊᖃᖅᖢᓂ ᓱᓕ, ᑖᒃᑯᐊ ᓄᓇᕗᑦ ᒐᕙᒪᒃᑯᖏᑦ ᕿᓂᖅᐳᐃᑦ ᓱᓕ ᐱᕙᒃᓴᓂᑦ ᒥᑭᓪᓕᕚᓪᓕᑎᑦᑎᓂᖕᒥᑦ ᐅᖅᓱᐊᓗᒃᓴᓂ ᐃᑭᑉᐸᒃᑕᑦᑎᓐᓂ ᒥᒃᖠᒋᐊᕐᓗᒍᓗ ᓯᓚᕐᔪᐊᑉ ᐅᔅᓯᒃᓯᕙᓪᓕᐊᔾᔪᑎᖏᓐᓂᑦ ᐊᕙᑎᑦᑎᓐᓄᐊᖅᐸᓪᓕᐊᔪᓂᑦ. ᓄᓇᕗᒻᒥᐅᓕᒫᑦ ᖃᓄᐃᓕᐅᕈᓐᓇᖅᑐᑦᑕᐅᖅ ᐱᐅᖅᓱᐊᖕᓂᒃᑯᑦ ᐊᐅᓚᔾᔪᑎᓂ ᑕᒪᓐᓇᓗ ᓄᓇᕗᑦ, ᐃᒪᖓ, ᓯᓚᓗ ᖃᓄᐃᙱᑦᑎᐊᕈᓐᓇᖁᓪᓗᒋᑦ ᑭᖑᕚᒃᓴᑦᑎᓐᓄᑦ.

ᐆᒻᒪᖅᑯᑎᑐᕈᓯᕐᓄᑦ ᖃᓄᖅᑑᒐᒃᓴᑦ

ᓂᒡᓕᓇᖅᑐᒥᑦ ᐊᑐᖃᑦᑕᕐᓗᑎᑦ ᐅᐊᓴᐃᓕᕌᖓᕕᑦ ᐊᓐᓄᕌᓂᑦ. ᑕᒪᕐᒥᑲᓴᒃ ᐊᐅᓚᔪᓐᓇᐅᑎᒥᑦ ᐊᑐᓲᖑᖕᒪᑦ ᐊᓐᓄᕌᑎᑦ ᐅᐊᓴᓕᕌᖓᖕᓂ ᐆᓇᖅᑎᓐᓇᓱᒡᓗᒍ ᐃᒪᖅ.