ᐊᓯᔾᔨᖅᐸᓪᓕᐊᔪᖅ ᐆᒻᒪᖅᑯᑎᑦ

ᓄᓇᕘᑉ ᐊᑐᖃᑦᑕᕐᓂᖓ ᓄᓇᒥᙶᖅᑐᓂᒃ ᐅᖅᓱᐊᓗᖕᓂᒃ ᐱᐅᓂᖃᖅᑐᖅ ᐱᐅᙱᓐᓂᖃᕆᓪᓗᓂᓗ. ᐃᓚᖓᓄᑦ, ᐃᒐᓯᐅᑎᒧᑦ ᐃᑯᒻᒪᑖᓲᑦ ᐊᒻᒪᓗ ᓄᓇᒥᙵᖅᑐᓂᒃ ᐅᖅᓱᐊᓗᖕᓄᑦ ᐊᖏᕐᕋᓂ ᐅᖅᑰᓴᕈᑕᐅᓲᑦ ᐋᖅᑭᒃᑎᐊᖅᓯᒪᓪᓗᑎᒃ ᐊᑐᑦᑎᐊᕈᓐᓇᖅᑐᑎᓪᓗ ᐱᒋᐊᕈᑎᒃᓴᖏᓪᓗ ᐊᑭᑐᓗᐊᕋᑎ ᐃᓕᔭᐅᓇᓱᒃᑎᓪᓗᒋᑦ. ᐊᐃᑉᐸᖓᓂᓪᓕ ᓄᓇᒥᙶᖅᓯᒪᔪᑦ ᐅᖅᓱᐊᓗᐃᑦ ᐊᑭᑦᑐᐸᓪᓕᐊᓕᕐᒪᑕ, ᓯᓚᐅᑉ ᓱᕈᑉᐸᓪᓕᐊᓂᖓᓂ, ᓯᓚᕐᔪᐊᑉ ᐅᔅᓯᒃᓯᕙᓪᓕᐊᔾᔪᑎᖏᓐᓂᒃ, ᐊᒻᒪᓗ ᐅᖅᓱᐊᓗᐃᑦ ᑯᕕᖃᑦᑕᕐᓂᖏᑦ ᐃᓱᒫᓘᑎᒋᔭᐅᖏᓐᓇᐅᔭᖅᑐᑦ. ᓄᓇᒥᙶᖅᓯᒪᔪᑦ ᐅᖅᓱᐊᓗᐃᑦ ᐊᔾᔨᒋᙱᒻᒥᔭᖓ ᑖᔅᓱᒫ ᓄᑖᙳᕆᐊᕈᓐᓇᖅᑐᖅ ᐆᒻᒪᖅᑯᑎᐅᑉ.

ᑕᐅᒎᓯᖓ ᓇᓗᓇᐃᖅᓯᔭᕇᖅᑐᖅ, ᓄᑖᙳᕆᐊᕈᓐᓇᖅᑐᖅ ᐆᒻᒪᖅᑯᑏᑦ ᓴᖅᑭᔮᕙᒌᕐᒪᑦ ᐃᒻᒥᓂᓗ ᓴᖅᑭᒃᑲᓐᓂᖅᐸᒃᖢᓂ, ᑕᐃᒪᐃᓐᓂᖓᓄᑦ ᑎᑭᑎᑦᑎᒋᐊᖃᙱᑦᑐᑦ ᐊᑭᑐᔪᓂᒃ ᐅᖅᓱᐊᓗᖕᓂᒃ. ᓴᓗᒪᒋᓪᓗᓂ, ᒥᑭᓪᓕᑎᕆᔪᖅ ᓱᕈᕐᓇᖅᑐᓂᒃ ᐊᓂᐊᑎᕆᔭᑦᑎᓐᓂᒃ ᐊᕙᑎᑦᑎᓐᓄᑦ. ᐊᐃᑉᐸᖓᓂ, ᐃᓚᖏᑦ ᓄᑖᙳᕆᐊᕈᓐᓇᖅᑐᖅ ᐆᒻᒪᖅᑯᑎᓅᖓᔪᑦ ᐊᑭᑐᔪᐊᓘᓪᓗᑎᒃ ᐊᒻᒪᓗ ᓂᐅᕐᕈᑕᐅᙱᑦᑐᑦ ᓱᓕ. ᑕᐃᒪᐃᒐᓗᐊᖅᑎᓪᓗᒍ, ᐱᓕᕆᔾᔪᑏᑦ ᓲᕐᓗ ᓯᕿᓂᕐᒧᑦ ᐊᓄᕆᒧᓪᓗ ᐆᒻᒪᖅᑯᑏᑦ ᓴᓇᔭᐅᕙᖕᒪᑕ ᓄᖅᑲᖅᑕᖅᑐᑎ, ᑕᐃᒪᐃᓐᓂᖓᓄᑦ ᑐᖅᑯᐃᕕᑕᖃᑦᑎᐊᙱᑎᓪᓗᓂ, ᐆᒻᒪᖅᑯᑏᑦ ᐊᑐᐃᓐᓇᐅᕙᒃᑐᑦ ᐅᓪᓘᑉ ᐃᓚᐅᓐᓇᑐᐊᖓᓂ.

ᐊᑖᓃᑦᑐᑦ ᓇᐃᓈᖅᑕᐅᓯᒪᔪᑦ ᐅᓂᒃᑲᐅᓯᐅᖅᓯᒪᔪᑦ ᐊᔾᔨᒌᙱᑦᑐᑦ ᓄᑖᙳᕆᐊᕈᓐᓇᖅᑐᑦ ᐆᒻᒪᖅᑯᑏᑦ ᐊᑐᐃᓐᓇᐅᔪᑦ ᓄᓇᕗᒻᒥᐅᓄᑦ.

ᓯᕿᓂᕐᒧᑦ ᐆᒻᒪᖅᑯᑏᑦ ᓯᕿᓂᕐᒥᙶᖅᑐᖅ ᓄᓇᕐᔪᐊᕐᒧᑦ ᑎᑭᑉᐸᓪᓕᐊᓲᖑᓪᓗᓂ ᓇᐃᑦᑑᑕᐅᓪᓗᑎᒃ ᐆᑖᕐᓇᖅᑑᓪᓗᑎᒃ. ᓇᐃᑦᑑᑏᑦ ᐆᑖᕐᓇᖅᑐᑦ ᑎᑭᑉᐸᒃᑐᑦ ᓄᓇᕐᔪᐊᕐᒧᑦ ᓇᓗᓇᐃᖅᑕᐅᓲᖑᒻᒥᔪᖅ ᓯᕿᓂᕐᒥᙶᕐᓂᖓᓂ. ᑕᒪᓐᓇ ᓄᑖᙳᕆᐊᕈᓐᓇᖅᑐᖅ ᐆᒻᒪᖅᑯᑎ ᒪᕐᕉᐃᓕᖅᑲᖓᔪᒃᑯᑦ: ᓯᕿᓂᐅᑉ ᖃᐅᒪᓂᖓᓄᑦ (PV) ᐊᒻᒪᓗ ᓯᕿᓂᕐᒨᕈᑎᓄᑦ. ᓯᕿᓂᐅᑉ ᖃᐅᒪᓂᖓ ᐊᓯᔾᔩᓲᖑᒻᒪᑦ ᓯᕿᓂᕐᒥᙶᖅᑐᖅ ᐆᒻᒪᖅᑯᑎᐅᓕᕐᓗᓂ ᐊᑐᖅᑐᑎᒃ ᓯᕿᓂᕐᒨᕈᑎᓂᒃ. ᓯᕿᓂᐅᑉ ᖃᐅᒪᓂᖓ ᐊᑐᖅᑕᐅᑎᓪᓗᓂ, ᓯᕿᓂᕐᒧᑦ ᐆᒻᒪᖅᑯᑏᑦ ᐊᑐᖅᑕᐅᓲᖅ ᐆᓇᖅᓰᓂᕐᒧᑦ ᓯᕿᓂᕐᒥᙶᖅᑐᖅ ᐃᓯᖅᐸᓪᓕᐊᖕᒪᑦ ᖄᕈᔪᖕᓄᑦ ᐱᖁᑎᓄᓪᓗ (ᓲᕐᓗ ᓯᕿᓂᕐᒨᕈᑎᓄᑦ).

ᐃᓂᒋᔭᐅᔪᑦ ᑕᓯᐅᔭᕐᔪᐊᑉ ᓯᔾᔭᑉᐸᓯᐊᓂ ᑭᕙᓪᓕᕐᒥᑦ ᑎᑭᕝᕕᐅᓂᖅᐹᓲᖑᖕᒪᑦ ᓯᕿᓂᕐᒥᙶᖅᑐᒥᒃ ᓄᓇᕘᒥ. ᓯᕿᓂᕐᒥᙶᖅᑐᖅ ᑎᑭᑉᐸᑦᑐᖅ ᑭᕙᓪᓕᕐᒧᑦ ᐊᔾᔨᓪᓗᐊᑕᕆᔭᖓ ᓯᕿᓂᕐᒧᑦ ᐆᒻᒪᖅᑯᑏᑦ ᑎᑭᖃᑦᑕᕐᓂᕆᔭᖓ ᑯᐊᐸᒃ ᓂᒋᐊᓂ, ᐋᓐᑎᐅᕆᐅᓕᒫᐸᓗᖕᒥᑦ, ᐊᒻᒪᓗ ᒥᐅᕆᑕᐃᒻᓯᒥᒃ. ᖃᓄᑎᒋ ᓯᕿᓂᕐᒧᑦ ᐆᒻᒪᖅᑯᑏᑦ ᑎᑭᑉᐸᓐᓂᖓ ᓄᓇᕘᑉ ᐅᐊᖕᓇᖓᓄᑦ ᐊᑦᑎᓂᖅᓴᐅᔪᖅ ᓇᒥᓕᒫ ᓄᓇᕘᒥ ᑲᓇᑕᒥᓗ. ᓯᕿᓂᕐᒨᕈᑏᑦ ᑕᕐᕋᖅᑑᑎᕐᔪᐊᕐᓚᐅᔭᐃᑦ ᐊᐅᓚᓂᖃᑦᓯᐊᕐᓂᑰᔪᑦ ᐃᓚᖏᓐᓂ ᐅᑭᐅᖅᑕᖅᑑᑉ ᓄᓇᓕᖏᓐᓂᒃ. ᐱᓗᐊᖅᑐᒥ, ᐃᖃᓗᐃᑦ ᓯᓚᑦᑐᖅᓴᕐᕕᐊᓂ ᓯᕿᓂᕐᒨᖅᑐᖅ ᑕᕐᕋᖅᑑᑎᕐᔪᐊᕐᓚᐅᔭᖅ ᐃᑯᒻᒪᓯᐅᑎᓂᒃ ᐊᐅᓚᓂᖃᖅᓯᒪᔪᖅ ᑕᐃᒪᙵᓂ ᐃᓕᔭᐅᔪᖕᒪᑦ 1995−ᒥ. ᓯᕿᓂᕐᒨᕈᑎ (20ᓄᑦ) ᐊᕙᑎᓄᑦ ᐃᑲᕐᕋᓄᑦ ᓯᕿᓂᕐᒥᙶᖅᑐᒥᒃ ᐃᓯᕐᕕᐅᓲᖅ ᐅᓪᓗᐃᑦ ᑕᑭᓛᖏᓐᓂᒃ ᐊᐅᔭᒃᑯᑦ ᐊᒻᒪᓗ ᐃᑲᕐᕋᓂᒃ ᑕᓪᓕᒪᓂᒃ ᐅᑭᐅᒃᑯᑦ ᑖᕐᓂᖅᐹᖑᖃᑦᑕᖅᑎᓪᓗᓂ.

ᓯᕿᓂᕐᒨᕈᑏᑦ ᐃᓕᔭᐅᓯᒪᖕᒥᔪᑦ ᓄᓇᕘᒥ. ᑕᐃᑲᓂ 2010−ᒥ, ᓄᓇᕗᑦ ᒐᕙᒪᒃᑯᑦ ᑎᓴᒪᓂᒃ ᐱᓕᕆᐊᖑᑲᐃᓐᓇᕐᓂᐊᖅᑐᓂᒃ ᐱᒋᐊᖅᑎᑦᑎᓚᐅᖅᑐᑦ ᐃᖃᓗᖕᓂ, ᐃᓚᒋᓪᓗᓂᒋᑦ ᐃᓕᔭᐅᓂᖓ ᓯᕿᓂᕐᒨᕈᑎ ᐊᑭᓐᓇᕐᒥᐅᑕᖅ ᐊᓂᕐᓂᒥ ᐆᓇᖅᓰᕙᒌᕈᑎᒥᒃ ᕿᑭᖅᑖᓘᑉ ᐋᓐᓂᐊᕕᐊᓗᐊᓂ ᐊᒻᒪᓗ ᓯᕿᓂᕐᒨᖅᑐᓄᑦ ᐃᒥᕐᒥᒃ ᐆᓇᖅᓰᕈᑎᓂᒃ ᐋᓐᓂᐊᕕᐅᑉ 40−ᓂᒃ ᐃᒡᓕᖃᖅᑐᒥᒃ ᓇᔪᕐᕕᐊᓂ, ᕿᑭᖅᑖᓘᑉ ᐃᑲᔪᖅᑕᐅᕕᖓᓂ ᐊᒻᒪᓗ ᒪᒃᑯᒃᑐᓄᑦ ᐃᑲᔪᖅᑕᐅᕕᖕᒥᑦ. ᑕᐃᑲᓂᓗ, ᓯᕿᓂᕐᒨᕈᑎ ᐊᑭᓐᓇᕐᒥᐅᑕᖅ ᐱᓕᕆᐊᒃᓴᖅ ᑕᐃᑲᓂ ᐊᓚᐃᑦᑐᖅ ᐃᓕᓐᓂᐊᕐᕕᐊᓗᐊᓂ ᑲᖏᖅᖠᓂᕐᒥᑦ ᐊᐅᓚᓂᖃᑦᓯᐊᖅᓯᒪᔪᖅ ᑕᐃᒪᙵᓂ 2002−ᒥ.

ᓯᕿᓂᐅᑉ ᖃᐅᒪᓂᖓᓅᕈᑏᑦ ᐊᒻᒪᓗ ᓯᕿᓂᕐᒨᕈᑏᑦ ᐊᑭᑭᓐᓂᖅᓴᐅᑎᒃᑎᔪᑦ ᐃᑯᒻᒪᓯᐅᑏᑦ ᐊᑭᓕᒃᓴᖏᓐᓂᒃ ᓱᕈᐃᙱᓐᓂᖅᓴᐅᓪᓗᑎᓪᓗ, ᑭᓯᐊᓂ ᐱᒋᐊᕈᑎᒃᓴᖏᑦ ᐃᓕᔭᐅᓂᐊᖅᑎᓪᓗᒋᑦ ᐊᑭᑐᒐᓗᐊᖅᑎᓪᓗᒋᑦ ᑎᑭᐅᔾᔭᐅᓂᐊᖅᑎᓪᓗᒋᑦ ᓄᓇᕘᒧᑦ.

ᓯᕿᓂᕐᒥᙶᖅᑐᖅ ᐆᒻᒪᖅᑯᑏᑦ ᐆᓇᖅᓰᓲᖑᒻᒪᑦ ᓄᓇᕐᔪᐊᑉ ᖄᐹᖓᓂ ᐊᔾᔨᒌᙱᑦᑐᒃᑯᑦ, ᑕᐃᒪᐃᓐᓂᖓᓄᑦ ᐊᓂᕐᓂ ᐊᔾᔨᒌᖃᑦᑕᖏᑦᑐᑦ. ᐆᓇᕐᓂᖅᓴᖅ ᐊᓂᕐᓂ ᑕᑉᐸᐅᖓ ᐃᖏᕐᕋᓲᖅ ᓂᓪᓕᓇᕐᓂᖅᓴᖅ ᐊᓂᕐᓂ ᑕᐅᓄᙵᐅᖔᓲᖑᓪᓗᓂ, ᑕᐃᒪᐃᓕᕌᖓᑦ ᐊᓄᕌᓕᖃᑦᑕᖅ. ᐊᓄᕆᐅᑉ ᓴᙱᓂᖓ ᐊᑐᖅᑕᐅᔪᓐᓇᖅᑐᖅ ᐊᓄᕆᓯᐅᑎᓄᑦ ᐃᒪᕐᒥᑦ ᐃᖏᕐᕋᑎᑦᑎᓂᕐᒧᑦ ᐅᕝᕙᓘᓐᓃᑦ ᐃᑯᒻᒪᓯᐅᑎᓕᐅᕈᑕᐅᔪᓐᓇᖅᑐᖅ ᐊᓄᕆᓯᐅᑎᕐᔪᐊᕐᓄᑦ.

ᖃᓄᑎᒋ ᐆᒻᒪᖅᑯᑎᓕᐅᕈᓐᓇᕐᒪᖔᖅ ᐊᓄᕆᓯᐅᑎ ᐱᔾᔪᑎᖃᖅᑐᖅ ᖃᓄᑎᒋ ᐊᖏᑎᒋᖕᒪᖔᖅ, ᐊᓄᕆᐅᑉ ᓱᒃᑲᓂᖓ ᐊᓄᕆᓯᐅᑎᐅᓪᓗ ᐳᖅᑐᓂᖓᓂ (ᐊᓄᕆᐅᑉ ᓱᒃᑲᓂᖓ ᓴᙱᓂᖅᓴᐅᒐᔪᖕᒪᑦ ᐳᖅᑐᓂᖅᓴᒥᒃ ᓄᓇᒥ). ᐊᓄᕆᐅᑉ ᓱᒃᑲᓂᖓ ᐊᓯᔾᔨᔭᒻᒪᑦ ᐆᒻᒪᖅᑯᑎᓕᐅᖅᑕᐅᔪᓪᓗ ᐊᓄᕆᓯᐅᑎᓄᑦ ᐊᓯᔾᔨᔪᓐᓇᕐᒥᔪᖅ. ᓴᙱᔪᒥᒃ ᐊᓄᕌᖅᑎᓪᓗᒍ ᓴᙱᓂᖅᓴᒥᒃ ᐆᒻᒪᖅᑯᑎᓕᐅᕐᓇᕐᒪᑦ, ᑭᓯᐊᓂ ᐊᓄᕆᒧᑦ ᐆᒻᒪᖅᑯᑏᑦ ᐊᐅᓚᔪᓐᓇᔾᔮᙱᑦᑐᑦ ᐊᓄᕆ ᓱᒃᑲᓂᖓ ᖄᖏᐅᑎᒃᐸᑦ ᐆᒻᒪᖅᑯᑎᓕᐅᕈᓐᓇᕐᓂᖓᓂ. ᐃᓕᔭᐅᓇᓱᓐᓂᖏᑦ ᐊᐅᓚᑕᐅᓂᖏᓪᓗ ᐊᓄᕆᓯᐅᑏᑦ ᐱᔭᕆᐊᑐᔪᑦ ᐅᑭᐅᖅᑕᖅᑐᒥ ᓯᓚ ᐱᔾᔪᑎᒋᓪᓗᒍ ᓲᕐᓗ ᓂᒡᓚᓱᕐᔪᐊᕐᓂᖅ ᓄᓇᐅᓪᓗ ᕿᕿᓯᒪᓂᖓ. ᐃᖏᕐᕋᑦᑎᐊᕈᓐᓃᓕᔭᒻᒪᑕ ᐊᓄᕆᒨᖅᑐᑦ−ᐃᒐᓯᐅᑎᒨᖅᑐᑦ ᐊᐅᓚᐅᑏᑦ ᐊᓄᕆᐅᑉ ᐊᓯᔾᔨᖃᑦᑕᕐᓂᖓ ᐱᔾᔪᑎᒋᓪᓗᒍ. ᐊᓄᕆᒨᖅᑐᑦ ᐃᓕᔭᐅᒐᔪᖕᒪᑕ ᐊᓄᕆᓯᐅᑕᐅᓪᓗᑎᒃ−ᐃᒐᓯᐅᑎᒧᓪᓗ ᓄᓇᓕᖕᓂ ᒥᑭᓐᓂᖅᓴᓂᑦ ᐃᒐᓯᐅᑎᒧᑦ ᐊᐅᓚᑕᐅᔪᓄᑦ ᐃᑯᒪᓕᐅᕈᑎᓄᑦ ᑖᒃᑯᐊ ᐃᓇᖏᖅᓯᔪᓐᓇᕐᓂᐊᕐᒪᑕ ᐊᓄᕆᐅᑉ ᓱᒃᑲᓂᖓ ᐊᓯᔾᔨᖅᓯᒪᓕᖅᐸᑦ. ᐊᓄᕆᐅᑉ ᐊᓯᔾᔨᖅᑕᓐᓂᖓ ᑭᒡᓕᖃᖅᑎᑦᑎᖕᒪᑦ ᐊᑦᑕᕐᓇᙱᑦᑐᒥᑦ ᖃᓄᑎᒋ ᐆᒻᒪᖅᑯᑎᓕᐅᕈᓐᓇᕐᒪᖔᖅ. ᐊᓄᕆ ᐊᓯᔾᔨᓗᐊᕐᓂᖓ ᐱᐅᔪᓐᓃᑎᑦᑎᔭᒻᒪᑦ ᐊᑐᑦᑎᐊᕈᓐᓃᑎᑦᑎᔭᒻᒪᓪᓗ ᐆᒻᒪᖅᑯᑎᓕᐅᕈᓐᓇᕐᓂᕐᒥᒃ.

ᐱᖓᓱᓂᒃ ᐊᓂᕆᒨᖅᑐᓂᒃ ᐆᒻᒪᖅᑯᑎᓂᒃ ᐱᓕᕆᐊᖑᔪᖃᓚᐅᑲᓚᐅᖅᑐᖅ ᓄᓇᕘᒥ, ᐊᑕᖏᖅᑐᑎ ᐃᒐᓯᐅᑎᒨᖓᓪᓗᑎ. ᐊᑕᐅᓯᕐᒥ ᐊᓄᕆᓯᐅᑎᒥ ᐃᓕᓯᔪᖃᓚᐅᖅᑐᖅ ᐃᖃᓗᒃᑑᑦᑎᐊᕐᒥᑦ ᑕᐃᑲᓂ 1994−ᒥ ᐊᐅᓚᓂᖃᓚᐅᖅᑐᖅ 1999−ᒧᑦ. ᒪᕐᕉᖕᓂᒃ ᐊᓄᕆᓯᐅᑏᓐᓂᒃ ᐊᐅᓚᔪᖃᓚᐅᖅᑐᖅ ᖁᕐᓗᖅᑑᕐᒥ 1997−ᒥᑦ 2002−ᒧᑦ. ᐊᑕᐅᓯᕐᒥᒃ ᐊᓄᕆᓯᐅᑎᒥ ᐊᐅᓚᔪᖃᓚᐅᖅᑐᖅ ᑲᖏᖅᖠᓂᕐᒥᑦ 2000−ᒥᑦ 2001−ᒧᑦ. ᑲᖏᖅᖠᓂᕐᒦᑦᑐᖅ ᐊᓄᕆᓯᐅᑎ ᐋᖅᑭᒋᐊᖅᑕᐅᓚᐅᖅᑐᖅ ᐅᑐᐱᕆ 2008−ᒥ ᑭᓯᐊᓂ ᐊᑐᕈᓐᓃᖅᑎᑕᐅᓚᐅᖅᑐᖅ. ᓄᓇᕗᒻᒥ ᐊᓄᕆᓯᐅᑏᑦ ᐆᑦᑐᖅᑕᐅᓚᐅᖅᑐᑦ ᐊᐅᓚᓂᖃᑦᑎᐊᓚᐅᙱᒻᒪᑕ, ᑲᒪᒋᔭᐅᙱᓐᓇᐅᔭᕆᐊᖃᖅᑐᑎᒃ, ᑮᓇᐅᔭᕐᓂᓪᓗ ᑭᒡᓕᖃᓚᐅᕐᒪᑕ.

ᓄᓇᕘᒥ ᐊᓄᕆᐅᑉ ᓱᒃᑲᓂᖏᑦ ᐆᑦᑐᖅᑕᐅᓯᒪᖕᒪᑕ ᑲᓇᑕᒥ ᐆᒻᒪᖅᑯᑎᓕᐅᕈᓐᓇᕐᓂᕐᒧᑦ ᐊᓄᕆᐅᑉ ᐃᖏᕐᕋᓂᖓᓄᑦ ᓄᓇᙳᐊᒃᑰᖅᓯᒪᔪᒃᑯᑦ.. ᑭᙵᐃᑦ, ᐊᕐᕕᐊᑦ ᑲᖏᖅᖠᓂᕐᓗ ᐊᓄᕌᒃᑲᐅᓛᖑᔪᑦ (ᓲᕐᓗ ᐊᓄᕆᐅᑉ ᓱᒃᑲᓂᖓ). ᓄᓇᓖᑦ ᐊᓄᕌᐸᓗᒃᐸᖕᒥᔪᑦ ᑖᒃᑯᐊᖑᔪᑦ ᐃᖃᓗᒃᑑᑦᑎᐊᖅ, ᑰᒑᕐᔪᒃ ᖃᐅᓱᐃᑦᑐᕐᓗ. ᐃᖃᓗᐃᑦ, ᓴᓪᓕᖅ ᖁᕐᓗᖅᑑᓪᓗ ᐊᓄᕆᑭᓐᓂᖅᐹᖑᔪᑦ. ᑲᓇᑕᒥ ᐆᒻᒪᖅᑯᑎᓕᐅᕈᓐᓇᕐᓂᕐᒧᑦ ᐊᓄᕆᐅᑉ ᐃᖏᕐᕋᓂᖓᓄᑦ ᓄᓇᙳᐊᒃᑰᖅᓯᒪᔪᖅ ᑐᙵᕕᖃᖅᑐᖅ ᐊᓄᕆᐅᑉ ᓱᒃᑲᓂᖓᓂ ᓄᐊᑕᐅᓯᒪᔪᓂᒃ ᓄᓇᕘᑉ ᖃᖓᑕᓲᒃᑯᕕᖏᓐᓂᒃ, ᓇᐸᔪᑯᑖᑦ ᐊᓄᕆᒧᑦ ᖃᐅᔨᓴᐅᑎᐅᙱᑦᑐᓄᑦ. ᓇᐸᔪᑯᑖᑦ ᐊᓄᕆᒧᑦ ᖃᐅᔨᓴᐅᑏᑦ ᐃᓕᔭᐅᓂᐊᖅᑐᒃᓴᐅᕗᑦ ᓯᕗᓂᒃᓴᒥᑦ ᐊᓄᕆᒨᖅᑐᓄᑦ ᐱᓕᕆᐊᒃᓴᕆᔭᐅᑲᐃᓐᓇᕐᓂᐊᖅᑐᓂᒃ ᐊᖏᖅᓯᒪᓚᐅᙱᓐᓂᖏᓐᓂᒃ ᐱᕙᓪᓕᐊᑎᑦᑎᓂᕐᒥᑦ ᓲᖃᐃᒻᒪ ᐆᑦᑑᑎᐅᑐᐃᓐᓇᖅᑐᑦ ᐊᑐᑦᑎᐊᙱᓐᓂᖅᓴᐅᖕᒪᑕ ᐱᕙᓪᓕᐊᓪᓚᑦᑖᖅᑐᓂᒃ. ᖁᓪᓕᒃᑯᑦ ᐆᒻᒪᖅᑯᑎᓕᕆᔨᒃᑯᑦ ᐸᕐᓇᓯᒪᔪᑦ ᓇᑉᐸᖅᓯᓗᑎᒃ ᒪᕐᕉᓐᓂᒃ ᐊᓄᕆᒥᑦ ᖃᐅᔨᓴᐅᑎᓂᒃ ᑭᙵᕐᓂ ᐊᑕᐅᓯᕐᒥᓗ ᐊᕐᕕᐊᓂ.

ᐊᐅᓚᔪᓐᓇᐅᑎᐅᔪᖅ ᐃᒪᕐᒥᑦ ᐊᐅᓚᔪᒥᒃ ᐊᓯᔾᔨᖅᑕᐅᔪᓐᓇᕐᒪᑦ ᐆᒻᒪᖅᑯᑎᒧᑦ ᐃᒪᖅ ᐃᖏᕐᕋᑎᑕᐅᖔᕐᓗᓂ ᐊᐅᓚᐅᑎᐊᓗᒃᑯᑦ. ᐊᐅᓚᐅᑎᐊᓗᐃᑦ ᐊᑐᕐᒪᑕ ᐃᑯᒪᓕᐅᕈᑎᓂᒃ, ᐃᒪᐅᑉ ᐃᖏᕐᕋᓂᖓ ᐊᐅᓚᑎᑦᑎᕙᒃᑐᖅ ᐅᐃᔾᔮᓲᖑᓪᓗᑎ, ᐊᓱᐃᓛᒃ ᐆᒻᒪᖅᑯᑎᓕᐅᓕᕐᓗᓂ.

ᒪᕐᕉᓐᓂᒃ ᐊᐅᓚᓂᑕᖃᕈᓐᓇᖅᑐᖅ ᐃᒪᕐᒧᐊᖅᑐᓄᑦ ᐆᒻᒪᖅᑯᑎᓕᐅᕐᓂᕐᒧᑦ: ᑖᓐᓇ “ᑰᑉ ᑰᖕᓂᖓ” ᐅᕝᕙᓘᓐᓃᑦ “ᑐᖅᑯᐃᕕᒃ” (ᑰᒃ) ᓴᓇᔭᐅᓯᒪᔪᖅ. ᑰᑉ ᑰᒃᑎᑕᐅᓂᖓ ᐊᐅᓚᐅᑎᖃᖅᑐᖅ ᐳᖅᑐᔪᐊᓗᖕᓃᑎᑕᐅᓲᑦ. ᑐᖅᑯᐃᕖᑦ ᓴᓇᔭᐅᓯᒪᓲᖑᓪᓗᑎᓕ ᑰᖏᑦ ᐃᒪᕐᒥᑦ ᓄᐊᑦᑎᓲᖑᓪᓗᑎ ᐃᒪᐅᑉ ᑰᓐᓂᖓᓂ ᐊᐅᓚᑦᑎᓂᕐᒧᑦ. ᒥᑭᑦᑐᑦ ᑰᑉ ᑰᖕᓂᖓᓄᑦ ᐆᒻᒪᖅᑯᑎᓕᐅᕈᑏᑦ ᐊᕙᑎᒧᑦ ᐊᒃᑐᐃᓂᖃᓗᐊᕈᓐᓇᖏᑦᑐᑦ ᑖᒃᑯᓇᙵᑦ ᑐᖅᑯᐃᕕᖕᓂ ᑭᓯᐊᓂ ᑲᒪᒋᔭᐅᔭᕆᐊᖃᒻᒪᕆᒃᑐᑦ. ᑰᑉ ᑰᖕᓂᖓᓄᑦ ᐊᑐᖅᑕᐅᓂᐊᖅᑐᖅ ᐅᑭᐅᖅᑕᖅᑐᒥ ᐃᓕᔭᐅᒋᐊᖃᕋᔭᖅᑐᖅ ᑰᖕᒧᑦ ᐃᖅᑲᖓᓄᑦ ᖁᐊᔭᖏᑦᑐᒧᑦ ᐅᑭᐅᒃᑯᑦ ᐊᕐᕋᒍᓕᒫᖅ ᐃᓗᐊᓂ ᐊᐅᓚᔪᓐᓇᕐᓂᐊᕐᒪᑦ ᐅᕝᕙᓘᓐᓃᑦ ᐲᖅᑕᐅᒋᐊᖃᓕᕋᔭᖅᑐᑦ ᐅᑭᐅᒃᑯᑦ ᖄᒃᑲᓐᓂᐊᒍᑦ ᐊᐅᓚᑦᑎᓂᕐᒧᑦ ᐊᑭᒃᓵᓘᓕᕋᔭᖅᑐᖅ.  ᑐᖅᑯᐃᕖᑦ ᐆᒻᒪᖅᑯᑎᓕᐅᕐᕖᑦ ᐆᒻᒪᖅᑯᑎᓂᒃ ᓴᓇᔪᓐᓇᖅᑐᑦ ᐊᕐᕌᒍᓕᒫᒨᖓᔪᒥᒃ ᐅᑭᐅᖅᑕᖅᑐᒥ ᐃᒪᐅᑉ ᑲᑎᖅᓱᖅᑕᐅᓯᒪᓂᖓ ᑲᒪᒋᔭᐅᑦᑎᐊᖅᐸᑦ ᐊᐅᓚᑦᑎᑦᑎᐊᕈᓐᓇᕐᓂᕐᒧᑦ.

ᑐᖅᑯᖅᑐᐊᓯᒪᔪᑦ ᑰᒃᑎᑕᐅᔪᓪᓗ ᐊᐅᓚᓂᖃᑦᑎᐊᖅᓯᒪᔪᑦ ᐅᑭᐅᖅᑕᖅᑐᒥ ᓲᕐᓗ ᓄᓇᑦᓯᐊᕐᒥ, ᔫᑳᓐᒥ ᐊᓛᔅᑲᒥᓪᓗ. ᓄᓇᕘᒥ ᓇᓗᓇᐃᕆᓯᒪᔪᑦ ᓇᒥ ᑕᐃᒪᐃᑦᑐᑕᖃᑐᐃᓐᓇᕆᐊᖃᕐᒪᖔᑦ. ᐃᖃᓗᐃᑦ ᖃᓂᒋᔮᓂ ᑭᕙᓪᓕᕐᒥᓪᓗ ᖃᐅᔨᓴᕐᓃᑦ ᐱᔭᕇᖅᑕᐅᓯᒪᔪᑦ. ᑭᕙᓪᓕᕐᒥ, ᐃᓂᒃᓴᕆᔭᐅᙳᐊᕋᔭᖅᑐᑦ ᐅᖓᓯᒃᑐᐃᓐᓇᐅᔪᑦ ᓄᓇᓕᓐᓂ ᑕᐃᒪᐃᓐᓂᖓᓄᑦ ᐊᑭᑐᓂᖅᓴᐅᒐᔭᖅᑐᖅ ᐱᕙᓪᓕᐊᑎᑦᑎᓂᕐᒧᑦ ᐊᑭᒃᓴᓂᒃ. ᐆᒻᒪᖅᑯᑎᑖᕈᒪᓂᖏᑦ ᐊᒥᓱᓂᑦ ᓄᓇᕘᑉ ᓄᓇᓕᖏᓐᓂᒃ ᐊᑦᑎᓗᐊᕐᒪᑦ ᐃᒪᕐᒧᐊᖅᑐᓄᑦ ᐆᒻᒪᖅᑯᑎᒃᓴᓂᒃ ᐱᕙᓪᓕᐊᑎᑦᑎᓂᕐᒥᑦ, ᑕᐃᒪᐃᓐᓂᖓᓄᑦ ᐃᒪᕐᒧᐊᖅᑐᑦ ᐆᒻᒪᖅᑯᑏᑦ ᐱᕙᓪᓕᐊᓯᒪᑦᑎᐊᖏᑦᑐᑦ ᓄᓇᕘᒥ. ᑭᓯᐊᓂ ᐅᔭᕋᓐᓂᐊᕐᕖᑦ ᐱᕙᓪᓕᐊᔪᒻᒪᕆᐅᓕᖅᐸᑕ ᐱᕕᖃᑐᐃᓐᓇᕆᐊᓕᒃ ᐋᖅᑭᒃᓱᐃᓂᕐᒥᑦ ᑕᒪᒃᑯᓂᖓ ᐆᒻᒪᖅᑯᑎᓕᐅᕈᑎᓂᒃ ᓯᕗᓂᒃᓴᒥᑦ. ᕿᑎᒥᐅᓂ ᑰᖏᑦ ᑰᖕᓂᖏᑦ ᖃᐅᔨᓴᖅᑕᐅᓯᒪᔪᑦ ᐆᒻᒪᖅᑯᑎᓕᐅᕈᓐᓇᕆᐊᒃᓴᖏᓐᓂᒃ, ᑭᓯᐊᓂ ᑐᑭᓯᒋᐊᕈᑎᓂᒃ ᐊᑐᐃᓐᓇᖅᑕᖃᙱᑦᑐᖅ. ᖃᐅᔨᓴᒃᑲᓐᓂᕆᐊᓖᑦ ᓯᕗᓂᒃᓴᒥᑦ ᐃᒪᕐᒧᐊᖅᑐᓄᑦ ᐆᒻᒪᖅᑯᑎᓕᐅᕈᓐᓇᕋᔭᕐᒪᖔᑦ ᕿᑎᕐᒥᐅᓂ. ᓯᕗᓪᓕᖅᐹᑦᓯᐊᒥ ᐃᒪᕐᒧᖅᑐᖅ ᐆᒻᒪᖅᑯᑎᓕᐅᕐᕕᒃ ᐋᖅᑭᒃᓱᖅᑕᐅᒐᔭᖅᑐᖅ ᐃᖃᓗᓐᓂ. ᐋᒻᓲᑉ ᑯᖓ ᐊᒻᒪᓗ ᔭᐃᓐᔅ ᕿᕐᖑᐊᓂ ᓇᓗᓇᐃᖅᑕᐅᓯᒪᔫᒃ ᐃᒪᕐᒧᐊᖅᑐᓄᑦ ᐆᒻᒪᖅᑯᑎᓕᐅᕐᕕᐅᔪᓐᓇᕆᐊᒃᓴᖏᓐᓂᒃ.

ᐆᓇᖅᑐᖅ ᓲᕐᓗ ᐅᖅᑰᓴᐅᑎᒥ ᐊᓂᐊᑎᑕᐅᕙᓪᓕᐊᔪᖅ ᐊᑐᖅᑕᐅᒃᑲᓐᓂᕈᓐᓇᕐᓂᖏᑦ ᐆᒻᒪᖅᑯᑎᐅᔪᖅ ᐊᓂᐊᓲᖑᓪᓗᓂ ᐆᓇᖅᑑᓪᓗᓂ, ᓴᓇᔭᐅᓲᖑᓪᓗᓂ ᐃᑯᒪᓕᐅᕈᑎᐅᑉ ᐃᓚᒃᓴᖏᑦ ᐊᑦᑐᐊᖃᑦᑕᐅᑎᑎᓪᓗᒋᑦ, ᐊᐅᓚᔪᓐᓇᐅᑎᓕᐅᕈᑕᐅᙱᖔᖅᑐᓂ. ᐆᓇᖅᑐᖅ ᐊᑐᖅᑕᐅᒃᑲᓐᓂᕈᓐᓇᕐᓂᖏᑦ ᐃᒐᓯᐅᑎᖕᒧᑦ ᐊᐅᓚᑕᐅᔪᓄᑦ ᐃᑯᒪᓕᐅᕈᑎᓄᑦ ᐊᑐᖅᑕᐅᒃᑲᓐᓂᕈᓐᓇᕐᒪᑕ ᐃᓕᐅᕋᖅᑕᐅᓗᑎ ᐅᖅᑰᓴᐅᑎᒃᓴᓄᑦ. ᐅᖅᑰᓴᐅᑏᑦ ᐱᖓᓱᐃᓕᖅᑲᖓᔪᑦ: ᐃᒐᓯᐅᑎᖕᒧᑦ ᐊᐅᓚᑕᐅᔪᓄᑦ ᐃᑯᒪᓕᐅᕈᑏᑦ, ᓱᓪᓗᑯᑖᑦ ᐃᖏᕐᕋᑎᑦᑎᔪᓐᓇᖅᑐᑦ ᐊᒻᒪᓗ ᐅᖅᑰᓴᖅᑎᑦᑎᔾᔪᑏᑦ. ᐅᖅᑰᓇᖅᓰᔾᔪᑎᓂ ᓄᐊᑦᑎᕙᖕᒪᑕ ᑕᐃᑲᙵᑦ ᐃᑯᒪᓕᐅᕈᑎᓂᒃ. ᓱᓪᓗᓕᑯᑖᒨᖓᔪᑦ ᐊᓂᐊᑎᕆᓲᖑᓪᓗᓂ ᐃᓪᓗᐊᓗᖕᓄᑦ ᑲᓲᒪᖃᑎᒋᔭᐅᔪᓄᑦ ᐃᑭᐊᖅᑎᓕᖅᑕᐅᓯᒪᔪᓂᒃ ᓱᓪᓗᐊᓗᒃᑯᑦ. ᑖᒃᑯᐊ ᑐᑦᑕᕐᕕᐅᔪᑦ ᐊᓂᐊᑎᑦᑎᓂᕐᒧᑦ ᐆᓇᖅᑐᒥᒃ ᑲᒪᒋᔭᖃᓲᑦ, ᐆᑦᑐᐃᓲᑦ ᐊᓂᐊᑎᑦᑎᓲᖑᓪᓗᑎᓗ ᐆᓇᖅᑐᒥᒃ ᐊᑐᓂ ᑲᓲᒪᖃᑕᐅᔪᓄᑦ ᐃᓪᓗᐅᓗᖕᒧᑦ. ᐊᑐᖅᑕᐅᓂᖓ ᐆᓇᖅᑐᖅ ᐊᑐᖅᑕᐅᒃᑲᓐᓂᕈᓐᓇᕐᓂᖏᑦ ᐊᑐᙱᓐᓂᖅᓴᐅᑎᑦᑎᖕᒪᑦ ᐅᖅᓱᐊᓗᖕᓂᒃ ᐊᓂᐊᑎᕆᙱᓐᓂᖅᓴᐅᓪᓗᓂᓗ ᓱᕈᓐᓇᖅᑐᓂᒃ ᐅᖅᑰᓴᖅᑎᑦᑎᖕᓂᖏᓐᓄᑦ ᐆᓇᖅᑐᒥᒃ ᐊᑐᖅᑎᑦᑎᒃᑲᓐᓂᓂᒃᑯᑦ ᐅᖅᓱᐊᓗᖕᒥᒃ ᐅᓯᕝᕕᐅᙱᖔᖅᑐᑎᒃ. ᐆᓇᖅᑐᖅ ᐊᑐᖅᑕᐅᒃᑲᓐᓂᕈᓐᓇᕐᓂᖏᑦ ᐊᓯᐊᒍᖔᖅ ᐅᖅᑰᓴᖅᑏᔾᔪᑕᐅᓲᖅ ᐊᑐᖅᑕᐅᓪᓗᓂ ᖁᓪᓕᒃᑯᓐᓂ ᐊᓯᓱᓂᒃ ᓄᓇᕘᑉ ᓄᓇᓕᖏᓐᓂᒃ. ᑮᓇᐅᔭᕐᓂᒃ ᒪᓂᒪᑎᑦᑎᖃᑦᑕᖅᓯᒪᔪᑦ ᐊᔾᔨᒌᙱᑦᑐᑦ ᒐᕙᒪᐃᑦ ᐃᒐᓯᐅᑎᒨᖅᑐᓄᑦ ᐆᒻᒪᖅᑯᑎᓕᐅᕐᕕᖕᓄᑦ ᓄᓇᕘᒥ. ᖁᓪᓕᒃᑯᑦ ᐸᕐᓇᓯᒪᔪᑦ ᐊᖏᓪᓕᑎᕆᓗᑎᒃ ᓴᖅᑭᔮᕙᒌᖅᑐᓂᑦ ᐆᓇᖅᑐᒥ ᐊᑐᖅᑕᐅᑎᑦᑎᒃᑲᓐᓂᕈᓐᓇᖅᑐᓂᒃ ᐊᒻᒪᓗ ᐋᖅᑭᒃᓱᐃᓗᑎᒃ ᓄᑖᓂᒃ ᐆᓇᖅᑐᒥ ᐊᑐᒃᑲᓐᓂᕈᓐᓇᖅᑎᑦᑎᔪᓂᒃ ᐊᓯᖏᓐᓂᒃ ᓄᓇᓕᖕᓂᒃ ᓄᓇᕘᒥ.

ᒪᓕᒐᓂ ᓯᖁᒥᑦᓯᖏᑦᑐᒃᑯᑦ ᐃᑭᑎᑕᐅᒐᒃᓴᐅᔪᑦ ᓴᓃᑦ ᓴᓇᕕᖕᓂ, ᐆᒪᔪᓕᕆᕝᕕᖕᓂᒃ ᐃᒡᓗᒋᔭᐅᔪᓂᓪᓗ ᐊᑦᑕᕐᕕᖕᒧᐊᖅᑕᐅᒐᔪᓲᑦ ᐃᑯᐊᓪᓚᒃᑎᑕᐅᔪᓐᓇᖅᑐᑦ ᓴᓂᕐᒥᑦ−ᐆᒻᒪᖅᑯᑎᒧᑦ (WTE) ᐃᑯᐊᓪᓚᑎᑦᓯᕕᖕᓂ ᐆᒻᒪᖅᑯᑎᓕᐅᕐᓂᐊᕐᒪᑕ / ᐆᓇᖅᑐᓕᐅᕐᓗᑎᓘᓐᓃᑦ ᐅᖅᑰᓴᖅᑎᑦᑎᓂᕐᒧᑦ, ᐊᐅᓚᐅᑎᓂᒃ ᐃᖏᕐᕋᓕᖅᑎᑦᑎᓲᖅ ᐆᒻᒪᖅᑯᑎᓕᐅᕐᓗᓂ ᐊᓂᐊᑎᑦᓯᓗᓂ ᐃᓪᓗᐊᓗᖕᓄᑦ ᐅᖅᑰᓴᖅᑎᑦᑎᓂᕐᒧᑦ ᑲᓲᒪᖃᑕᐅᔪᓄᑦ.  ᓴᓂᕐᒥᑦ−ᐆᒻᒪᖅᑯᑎᒧᑦ ᐃᑯᐊᓪᓚᑎᑦᓯᕖᑦ ᐊᐅᓚᓂᖃᑦᓯᐊᕐᓂᑰᔪᑦ ᐆᒻᒪᖅᑯᑎᓕᐅᕐᓂᕐᒥᑦ ᐊᒻᒪ / ᐅᕝᕙᓘᓐᓃᑦ ᐅᖅᑰᓴᖅᑎᑦᑎᓂᕐᒥᑦ ᐅᑭᐅᖅᑕᖅᑐᒥ. ᑕᓪᓕᒪᓂᒃ ᓴᓂᕐᒥᑦ−ᐆᒻᒪᖅᑯᑎᒧᑦ ᐃᑯᐊᓪᓚᑎᑦᓯᕕᑕᖃᖅᑐᖅ ᐊᑯᑭᑦᑐᓂ ᐸᕐᓇᓯᒪᓪᓗᑎᓗ ᐊᖏᓪᓕᑎᕆᓗᑎ ᐃᑯᐊᓪᓚᑎᑦᓯᕕᖓᓂ ᓅᒃᒥ, ᐊᖓᔪᖅᑳᖃᕐᕕᐅᔪᖅ ᐊᑯᑭᑦᑐᓂ.

ᓄᓇᕗᑦ ᒐᕙᒪᒃᑯᑦ ᐆᒻᒪᖅᑯᑎᓕᕆᓂᕐᒧᑦ ᐅᐸᓗᖓᐃᔭᐅᑎᖓ (2007) ᓇᓗᓇᐃᕆᓯᒪᔪᖅ ᐱᒋᐊᖅᑎᑦᑎᓂᕐᒥᑦ ᖃᐅᔨᓴᕐᓂᕐᒥᑦ ᓇᓗᓇᐃᖅᓯᓇᓱᓐᓂᕐᒥᑦ ᒥᑭᑦᑑᑎᓂᑦ ᐃᑯᐊᓪᓚᑎᑦᓯᕕᖕᓂ ᐱᓕᕆᐊᖑᑲᐃᓐᓇᕐᓂᐊᖅᑐᓂᑦ ᓄᓇᕘᒥ. ᖃᐅᔨᓇᓱᓐᓂᕐᒥᑦ ᒥᑭᑦᑑᑏᑦ ᓴᓂᕐᓂᒃ ᐃᑯᐊᓪᓚᑎᑦᓯᕖᑦ ᐅᖅᑰᓴᐅᑎᒃᓴᒧᑦ ᐊᑐᖅᑕᐅᔪᓐᓇᕋᔭᕐᒪᖔᖅ ᓄᓇᕘᒥ, ᓄᓇᕘᑉ ᓴᓂᕐᓂᒃ ᑲᒪᒋᔭᖃᕐᓂᖓ ᕿᒥᕐᕈᔭᐅᔭᕆᐊᓕᒃ. ᒫᓐᓇᐅᔪᖅ, ᐊᖏᓗᐊᙱᑦᑐᒥᒃ ᓴᓂᕐᓂᒃ ᐃᑯᐊᓪᓚᑎᑦᓯᕕᖕᒥᑦ ᓂᐅᕕᖅᑐᖃᓚᐅᖅᑐᖅ 2014 ᐱᒋᐊᙵᕐᓂᖓᓂ ᐃᖃᓗᐃᑦ ᓄᓇᓕᐸᐅᔭᒃᑯᖏᓐᓄᑦ, ᐃᑲᔪᖅᓱᖅᑕᐅᓪᓗᑎᒃ ᑲᓇᑕᒥ ᐅᑭᐅᖅᑕᖅᑐᒥ ᐱᕙᓪᓕᐊᑎᑦᓯᓂᕐᒧᑦ ᑲᑐᔾᔨᖃᑎᒌᒃᑯᖏᓐᓂᒃ.

ᐆᒪᔪᒥᙶᖅᑐᖅ ᐱᕈᖅᓯᐊᕐᒥᙶᖅᑐᕐᓘᓐᓃᑦ ᐆᒻᒪᖅᑯᑎᓕᐅᕈᑎᒃᓴᑦ ᓴᓇᔭᐅᔪᓐᓇᖅᑐᑦ ᐅᖅᓱᒃᓴᓂᒃ, ᐅᖅᓱᕐᒥᑦ ᓱᑲᓂᓪᓗ ᐲᔭᖅᑕᐅᔪᓂᑦ ᐱᕈᖅᓯᐊᕐᓂᒃ ᓂᕐᔪᑎᓂᓪᓗ/ᐆᒪᔪᓂᑦ. ᓄᓇᕘᒥ ᐆᒪᔪᓕᕆᖃᕐᕕᒃᑕᖃᙱᒻᒪᑦ, ᑕᐃᒪᐃᒻᒪᑦ, ᐱᕈᖅᓯᐊᑦ ᓲᕐᓗ ᑲᓅᓚ ᐊᒻᒪᓗ ᓱᐃᐲᓐᔅ ᐊᑐᖅᑕᐅᖃᑦᑕᖅᑐᑦ ᐆᒻᒪᖅᑯᑎᓕᐅᕈᑎᒃᓴᓄᑦ ᑎᑭᑎᑕᐅᔭᕆᐊᖃᕋᔭᖅᑐᑦ. ᐱᕈᖅᓯᐊᕐᓂᒃ ᑎᑭᑎᑦᓯᖃᑦᑕᕐᓂᖅ ᐊᑑᑎᖃᑦᑎᐊᕋᔭᙱᑦᑐᖅ ᐃᓇᖏᖅᓯᓂᕐᒥᑦ ᓄᓇᒥᙶᖅᑐᓄᒃ ᐅᖅᓱᐊᓗᖕᓂᒃ.

ᐆᒪᔪᒥᙶᖅᑐᖅ ᐱᕈᖅᓯᐊᕐᒥᙶᖅᑐᕐᓘᓐᓃᑦ ᐆᒻᒪᖅᑯᑎᓕᐅᕈᑎᒃᓴᑦ ᐱᓕᕆᐊᒃᓴᑦ ᐊᑐᖅᑐᑦ ᐃᖃᓗᕕᓃᑦ ᓴᓂᖏᓐᓂᒃ ᐊᐅᓚᓂᖃᑦᓯᐊᕐᓂᑰᔪᑦ ᓄᓇᓕᖕᓂ ᐅᖓᓯᒃᑐᒦᑦᑐᓂᑦ (ᓲᕐᓗ ᐊᓛᔅᑲᒥ) ᐊᒻᒪᓗ ᐆᒻᒪᖅᑯᑎᓕᕆᓂᕐᒧᑦ ᐅᐸᓗᖓᐃᔭᐅᑎᖓᓂᒃ ᓄᓇᕗᑦ ᒐᕙᒪᒃᑯᑦ ᓴᖅᑮᓯᒪᔪᑦ ᖃᐅᔨᓴᕈᒪᓂᖏᓐᓂᒃ ᐊᔾᔨᐸᓗᖏᓐᓂᒃ ᐆᑦᑐᕐᓗᑎᒃ ᓄᓇᕘᒥ. ᓄᓇᕘᒥ ᐃᖃᓗᓕᕆᕝᕖᑦ ᑲᒪᓲᖑᒻᒪᑦ ᐃᖃᓗᖕᓂᑦ ᐊᒻᒪᓗ ᐊᑯᑭᑦᑑᑉ ᖃᓕᕋᓕᖏᓐᓂᒃ. ᐃᖃᓗᐃᑦ ᓂᐅᕐᕈᑕᐅᓲᖑᖕᒪᑕ ᑎᓴᒪᓄᑦ ᐃᖃᓗᓕᕆᕝᕕᖕᓄᑦ. ᐊᑕᐅᓯᐅᔪᖅ ᐃᖃᓗᓕᕆᕝᕕᒃ ᑲᒪᒋᔭᖃᖅᐸᖕᒥᔪᖅ ᐃᒪᕐᒥᐅᑕᓂᒃ ᐆᒪᔪᓂᑦ (ᓇᑦᑏᑦ ᕿᓚᓗᒐᐃᓪᓗ). ᒪᕐᕈᐃᓐᓈᒃ ᑎᓴᒪᐅᔪᓂᑦ ᐃᖃᓗᓕᕆᕝᕕᐅᔪᑦ ᓂᐅᕕᖅᐸᒃᑐᑦ ᐃᓗᐃᑦᑐᓂᒃ ᐃᖃᓗᓐᓂ (ᓲᕐᓗ ᐃᕐᕋᕕᖏᑦ ᐲᔭᖅᑕᐅᓯᒪᓇᑎ) ᑭᓯᐊᓂ ᐅᑭᐅᒃᑯᑐᐊᖅ ᑕᐃᒪᐃᓲᖑᓪᓗᑎ. ᐊᐅᔭᒃᑯᑦ, ᐃᖃᓗᐃᑦ ᓂᐅᕕᖅᑕᐅᔪᑦ ᐃᕐᕋᕖᔭᖅᑕᐅᓯᒪᕙᒌᓲᑦ. ᐃᖃᓗᐃᑦ ᐊᒥᐊᒃᑯᕐᓗᖏᑦ ᐃᖃᓗᓕᕆᕝᕕᖕᓂᑦ ᑐᓐᓂᓴᖅᑕᐅᒐᔪᓲᑦ (ᕿᒻᒥᖃᖅᑎᐅᔪᓄᑦ ᓄᓇᓕᖕᒥ) ᐊᒻᒪᓗ ᐃᖃᓗᐃᑦ ᓴᓂᕈᔪᖏᑦ (ᐃᒋᑕᐅᑐᐃᓐᓇᓲᖑᓪᓗᑎ).

ᖃᐅᔨᓴᕈᒪᓂᕐᒥᑦ ᐋᖅᑭᒃᓱᐃᓂᕐᒥᑦ ᐆᒪᔪᒥᙶᖅᑐᓂᑦ ᐱᕈᖅᓯᐊᕐᒥᙶᖅᑐᕐᓘᓐᓃᑦ ᐆᒻᒪᖅᑯᑎᓕᐅᕈᑎᒃᓴᓂᒃ ᓄᓇᕘᒥ, ᐱᒻᒪᕆᐅᒐᔭᖅᑐᖅ ᖃᐅᔨᓴᕐᓂᕐᒥᑦ ᐃᖃᓗᐃᑦ ᐃᒪᕐᒥᐅᑕᐃᓪᓗ ᓴᓂᖏᓐᓂᒃ. ᑭᓯᐊᓂ, ᐃᓱᒫᓘᑎᑕᖃᕐᒪᑦ ᓂᐅᕕᖅᑕᐅᖃᑦᑕᕐᓂᖏᑦ ᐆᒻᒪᖅᑯᑎᓕᐅᕈᒪᓂᕐᒧᑦ ᖄᖏᐅᑎᑐᐃᓐᓇᕆᐊᓕᒃ ᓂᕿᐅᑉ ᐅᑭᓪᓗᐊᑕᖓᓂ ᐊᒃᑐᐃᓂᖃᒃᑲᓐᓂᓕᕐᓗᓂᓗ ᓂᕿᖃᐅᓐᓇᐅᔭᑎᑦᑎᓇᓱᓐᓂᕐᒥᑦ.

ᑕᕆᐅᕐᔪᐊᕐᒧᑦ ᐆᒻᒪᖅᑯᑏᑦ ᓴᓇᔭᐅᓲᖅ ᐊᔾᔨᒌᙱᑦᑐᒃᑯᑦ (ᓲᕐᓗ, ᐅᓕᖃᑦᑕᕐᓂᖓᑕ ᐃᖏᐅᓕᖏᓐᓄᑦ, ᐃᖏᐅᓖᑦ ᓴᙱᓂᖏᓐᓄᑦ,  ᑕᕆᐅᑉ ᐆᓇᖅᓯᓂᖓ ᓯᕿᓂᕐᒧᑦ ᖃᓄᑎᒋᓪᓗ ᑕᕆᐅᖃᕐᒪᖔᖅ). ᑕᕆᐅᕐᔪᐊᕐᒧᑦ ᐆᒻᒪᖅᑯᑎᓕᐅᕈᑏᑦ ᓄᑖᐸᓘᖕᒪᑦ ᐅᓕᖃᑦᑕᕐᓂᖓᓄᓪᓗ ᐃᖏᐅᓕᓂᖓᓄᑦ ᐊᑐᖅᑕᐅᓯᒪᔪᖃᖅᑐᖅ. ᓄᓇᕐᔪᐊᓕᒫᒥᑦ ᐅᓕᖃᑦᑕᕐᓂᖓᓄᑦ ᐃᖏᐅᓕᖕᓄᑦ ᐆᒻᒪᖅᑯᑎᓕᐅᖅᑐᖃᕈᒪᓯᒪᔪᖅ ᓲᖃᐃᒻᒪ ᐃᖏᐅᓕᓄᑦ ᐆᒻᒪᖅᑯᑎᓕᐅᕈᑏᑦ ᐊᕝᕙᓪᓗᐊᒃᑲᓂᖓᓂ ᓴᙱᓂᖅᓴᐅᖕᒪᑦ ᐊᓄᕆᒨᖓᔪᓂᒃ ᐊᒻᒪᓗ 100−ᓂᒃ ᐃᓚᒃᑲᓐᓂᕐᓗᒍ ᐊᑑᑎᖃᓐᓂᖅᓴᐅᔪᖅ ᓯᕿᓂᕐᒨᖓᔪᓂᒃ. ᐅᓕᓐᓃᑦ ᐃᖏᐅᓕᖏᑦ ᓇᓚᐅᑦᑖᖅᑕᐅᔪᓐᓇᕐᒪᑕ ᑕᒻᒪᖅᓯᒪᙱᓐᓂᖅᓴᐅᓪᓗᑎᓗ. ᒫᓐᓇᐅᔪᖅ, ᒪᕐᕈᐃᓕᖅᑲᖓᔪᒃᑯᑦ ᐆᒻᒪᖅᑯᑎᓕᐅᕈᓐᓇᖅᑐᑦ ᐅᓕᑉᐸᓪᓕᐊᓂᖓᑕ ᐃᖏᐅᓕᖏᓐᓄᑦ: ᐅᓕᑉᐸᓪᓕᐊᓂᖓᓄᑦ ᑕᕆᐅᕐᒥᑦ ᐃᓯᑦᑎᑦᑎᓗᑎᒃ ᐊᒻᒪᓗ ᐅᓕᑉᐸᓪᓕᐊᓂᖓᓄᑦ ᐸᐅᑎᓂᒃ. ᑕᕆᐅᕐᒥᑦ ᐃᓯᑦᑎᑦᑎᓂᖅ ᐊᔾᔨᒋᐸᓗᒃᑕᖓ ᑰᑉ ᓴᓇᒪᓯᒪᓂᖓᓂ, ᐃᒪᕐᒥᑦ ᑐᖅᑯᐃᓲᖑᓪᓗᑎ ᐊᓂᐊᑕᐅᕙᓪᓕᐊᓪᓗᓂ ᐊᐅᓚᐅᑎᓄᑦ ᐆᒻᒪᖅᑯᑎᓕᐅᕐᓂᕐᒧᑦ. ᐅᓕᑉᐸᓪᓕᐊᓂᖓᓄᑦ  ᐸᐅᑏᑦ ᐊᓄᕆᓯᐅᑏᑦ ᐊᔾᔨᕐᓚᐅᔭᖏᑦ ᐃᖏᐅᓕᕙᓪᓕᐊᔪᓂ ᐊᑐᓲᖑᓪᓗᑎ ᐊᐅᓚᑕᐅᓗᐊᕌᓗᒋᐊᑐᖏᑦᑐᑦ.

ᐊᔾᔨᒌᙱᑦᑐᓂᑦ ᐅᓕᑉᐸᓪᓕᐊᓂᖓᓄᑦ ᐸᐅᑎᑕᖃᐅᖅᑐᖅ, ᑭᓯᐊᓂ ᑕᒪᕐᒥᑦᑎᐊᑦ ᑕᐃᒫᑦᓴᐃᓐᓇᐸᓗᒃ ᐃᖏᕐᕋᕙᒃᑐᑦ ᐃᒪᐅᑉ ᐃᖅᑲᖓᓂ ᐃᖏᐅᓕᓂ ᐊᑐᓲᖑᓪᓗᓂ ᐸᐅᑎᓂᑦ ᐃᖏᕐᕋᑎᑦᑎᓂᕐᒧᑦ. ᐃᒪᐅᑉ ᐃᖅᑲᖓᓃᒐᔪᒃᑐᑦ. ᑲᓇᑕᒥ ᒫᓐᓇᐅᔪᖅ ᑕᒪᒃᑯᐊ ᖃᐅᔨᓴᖅᑕᐅᕙᓪᓕᐊᔪᑦ (ᐳᕆᑎᔅ ᑲᓚᒻᐱᔭᒥ ᓅᕙ ᔅᑰᓴᒥᓗ), ᐊᒥᐊᓕᒐᐃᑦ ᓄᓇᖓᓂ (ᐊᓛᔅᑲᒥ), ᔫᕆᑉᒥᓪᓗ (ᐊᐃᔪᓚᓐᒥ ᔅᑳᑦᓚᓐᒥᓪᓗ).

ᐅᓕᓐᓂᐅᑉ ᐃᖏᐅᓕᖓᑕ ᓴᙱᓂᖓ ᓄᓇᕘᒥ ᐊᖏᓂᖅᐹᖑᓇᓱᒋᔭᐅᔪᖅ ᑲᓇᑕᒥ. ᐊᒥᓱᑦ ᐃᓂᒃᓴᕆᔭᐅᔪᓐᓇᓪᓗᐊᖅᑐᑦ ᐆᒻᒪᖅᑯᑎᓕᐅᕐᓂᕐᒧᑦ ᐅᓕᓐᓂᖓᑕ ᐃᖏᐅᓕᖏᓐᓂ ᐊᑐᕐᓗᓂ ᐅᖓᓯᒃᑐᒦᒻᒪᑦ ᓄᓇᕘᒥ ᐱᕙᒃᓴᖅᑕᖃᖅᑰᕋᔭᙱᑦᑐᖅ ᖃᐅᔨᓴᓇᓱᓐᓂᕐᒥᑦ ᐱᕙᓪᓕᐊᑎᑕᐅᔪᓐᓇᕋᔭᕐᒪᖔᑦᑕ. ᐸᐅᑏᑦ ᐊᑭᑐᖕᒪᑕ ᑕᐃᒪᐃᑦᑐᓂᓪᓗ ᐊᑐᓕᖅᑎᑦᑎᓇᓱᓐᓂᖅ ᐊᑦᑕᕐᓇᑐᐃᓐᓇᕆᐊᓕᒃ ᐅᑭᐅᖅᑕᖅᑑᑉ ᓯᓚᖓ ᐃᓱᒪᒋᓗᒍ. ᐅᓕᑉᐸᓪᓕᐊᓂᕐᒧᑦ ᐃᖏᐅᓕᓄᑦ ᐆᒻᒪᖅᑯᑎᓕᐅᕐᓂᕐᒥᑦ ᐱᕙᓪᓕᐊᑎᑕᐅᑐᐃᓐᓇᕆᐊᓕᒃ ᑕᓯᐅᔭᕐᔪᐊᕐᒥᑦ, ᐅᓕᖃᑦᑕᕐᓂᖓ ᐊᖏᓂᖅᐹᖑᖃᑕᐅᔪᖅ ᑲᓇᑕᓕᒫᒥ. ᐸᐅᑏᑦ ᐃᖅᑲᖓᓃᑎᑕᐅᔪᑦ ᐆᒻᒪᖅᑯᑎᓕᐅᑐᐃᓐᓇᕆᐊᓕᒃ ᐃᖃᓗᓐᓄ, ᐃᓄᒋᐊᕐᓂᖏᓐᓄᑦ ᐃᑯᒻᒪᓯᐅᑎᓂᓪᓗ ᐱᔭᕆᐊᖃᕐᓂᖏᑦ ᐅᓄᕐᓂᖏᓐᓄᑦ ᐃᑲᔪᖅᓱᕈᓐᓇᖅᑐᖅ ᐊᑭᑐᔫᓂᖓᓄᑦ ᐅᓕᑉᐸᓪᓕᐊᓂᖓᓄᑦ ᐆᒻᒪᖅᑯᑎᓕᐅᕐᓂᕐᒧᑦ ᐱᕙᓪᓕᐊᑎᑦᑎᓂᕐᒥᑦ.

ᐆᑦᑑᑎᒃᓴᓂᑦ ᐅᓕᖃᑦᑕᕐᓂᖓᑕ ᐃᖏᐅᓕᖏᓐᓂ ᐊᒻᒪᓗ ᐅᓕᖃᑦᑕᕐᓂᖓᓄᑦ ᐆᒻᒪᖅᑯᑎᓕᐅᕐᓂᕐᒥᑦ ᑕᓯᐅᔭᕐᔪᐊᕐᒥᑦ ᐊᑐᓕᖁᔭᐅᔪᑦ ᑭᖑᓪᓕᕐᒥᑦ ᖃᓄᐃᓕᐅᕈᑕᐅᓗᑎ ᖃᐅᔨᓴᓐᓂᕐᒧᑦ ᐅᓕᖃᑦᑕᕐᓂᖓᓄᑦ ᐆᒻᒪᖅᑯᓕᐅᕈᓐᓇᕋᔭᕐᒪᖔᑦ ᐃᖃᓗᓐᓂ. ᓯᑰᑉ ᐋᖅᑭᐅᒪᓂᖓ ᑕᓯᐅᔭᕐᔪᐊᕐᒥᑦ ᐃᓱᒪᒋᔭᐅᔭᕆᐊᖃᕐᒥᔪᑦ ᑐᕙᖓᓗ ᓯᓈᖓᓗ ᐊᒃᑐᐃᓂᖃᑐᐃᓐᓇᕆᐊᖃᕐᓂᖏᓐᓂᒃ ᐸᐅᑎᐅᔪᓂᒃ.

ᐊᖏᔫᑏᑦ ᓄᖑᔪᐃᑦᑐᕐᒨᖓᔪᑦ ᐊᐅᓚᔾᔪᑏᑦ ᐃᑲᔫᑎᖃᕋᔭᖅᑐᖅ ᐃᓄᒋᐊᒃᑐᓄᑦ ᖃᓪᓗᓈᑦ ᓄᓇᖓᓐᓂ ᑲᓇᑕᒥ ᑭᓯᐊᓂ ᓄᓇᕘᑉ ᐆᒻᒪᖅᑯᑎᓂᑦ ᐱᔭᕆᐊᖃᕐᓂᖓ ᐊᑦᑎᓂᖅᓴᐅᓂᖓᓄᑦ ᐊᕕᑦᑐᖅᓯᒪᐅᓐᓂᖏᓐᓄᓪᓗ ᒥᑭᑦᑑᑎᓂᒃ ᓄᖑᔪᐃᑦᑐᕐᒧᑦ ᐊᐅᓚᔾᔪᑎᓂᒃ ᐊᑐᕈᓐᓇᖃᔭᖅᑐᑦ (ᐃᒪᐃᑦᑑᓂᕋᖅᑕᐅᒻᒥᔪᑦ “ᓄᖑᔪᐃᑦᑐᑦ ᕚᑕᓖᑦ”) ᐊᑑᑎᖃᓐᓂᖅᓴᐅᒐᔭᖅᑐᑦ.

ᒥᑭᑦᑑᑏᑦ ᓄᖑᔪᐃᑦᑐᕐᒧᑦ ᐊᐅᓚᔾᔪᑏᑦ ᐱᕙᓪᓕᐊᑎᑕᐅᔪᑦ ᐊᑐᖅᑕᐅᖔᑐᐃᓐᓇᕆᐊᖃᖅᑐᑎᒃ ᓄᓇᒥᙶᖅᑐᓂᒃ ᐅᖅᓱᐊᓗᖕᓂᒃ ᐊᑐᙱᖔᕐᓗᑎᒃ ᐅᑭᐅᖅᑕᖅᑐᒥ, ᐅᖓᓯᑦᑐᓂᑦ ᓄᓇᓕᖕᓂ, ᐱᕙᓪᓕᐊᔪᓄᓪᓗ ᐃᓂᒋᔭᐅᔪᓄᑦ. ᑕᒪᒃᑯᐊ ᒥᑭᑦᑑᑏᑦ ᓄᖑᔪᐃᑦᑐᕐᒨᖓᔪᑦ  ᓴᓇᔭᐅᓯᒪᕙᒌᕈᓐᓇᖅᑐᑦ ᐃᓂᒃᓴᖏᓐᓅᕈᔾᔭᐅᓗᑎᓗ. ᐊᕕᑦᑐᖅᓯᒪᐅᓐᓂᖏᓐᓄᑦ ᐱᔭᕆᐊᑭᑦᑐᒃᑯᑦ ᓄᑦᑎᖅᑕᐅᔪᓐᓇᖅᑐᑦ. ᐱᔾᔪᑎᒋᓪᓗᒍ ᑖᒃᑯᐊ ᐊᓯᔾᔨᖅᑕᐅᔪᓐᓇᕐᓂᖏᑦ ᓴᓇᔭᐅᔪᓐᓇᖅᑐᑦ ᓄᓇᓕᐅᑉ ᐆᒻᒪᖅᑯᑎᒥᑦ ᐱᒋᐊᖃᕐᓂᖏᓐᓄᑦ ᓈᒻᒪᒋᔭᒥᓂᒃ (ᓲᕐᓗ ᐊᑕᐅᓯᑕᐅᕐᒥ ᐊᑐᕐᓗᑎᒃ ᐅᕝᕙᓘᓐᓃᑦ ᐊᒥᓱᓂᒃ ᑲᓲᒪᑎᑦᑎᓗᑎᒃ ᐆᒻᒪᖅᑯᑎᖃᕐᓂᖅᓴᐅᔭᕆᐊᓕᖕᓄᑦ). ᑕᒪᒃᑯᐊ ᓱᓕ ᐊᖏᖅᑕᐅᓯᒪᙱᑦᑐᑦ ᑲᓇᑕᒥ ᐊᑐᖅᑕᐅᔪᓐᓇᕐᓗᑎ ᒫᓐᓇᐅᔪᖅ ᓂᐅᕐᕈᑕᐅᔪᓐᓇᙱᑦᑐᒦᑎᑕᐅᔪᑦ.

ᓲᕐᓗ ᐊᖏᔫᑕᐅᔪᑎᑐᑦ ᓄᖑᔪᐃᑦᑐᓄᑦ ᐊᐅᓚᔾᔪᑏᑦ, ᒥᑭᑦᑑᑏᑦ ᓄᖑᔪᐃᑦᑐᕐᒧᑦ ᐊᐅᓚᔾᔪᑏᑦ ᐊᑲᐅᙱᓕᐅᕈᑎᖃᓕᑐᐃᓐᓇᕆᐊᓖᑦ ᐊᕙᑎᓕᕆᓂᕐᒧᑦ ᑎᒥᒧᓪᓗ ᐊᑦᑕᕐᓇᑐᐃᓐᓇᕆᐊᓕᒃ. ᐊᕙᑎᒧᑦ ᑎᒥᒧᓪᓗ ᐊᑦᑕᕐᓇᕈᑏᑦ ᓄᖑᔪᐃᑦᑐᖅ ᑯᕕᓐᓂᖅᐸᑦ, ᓄᑦᑎᖅᑎᑕᐅᓂᖏᑦ ᓄᖑᔪᐃᑦᑐᕈᔪᐃᑦ, ᐊᒻᒪᓗ ᐊᑦᑕᕐᓇᙱᑦᑐᒃᑯᑦ ᐊᐅᓚᑕᐅᓂᖏᑦ ᐲᔭᖅᑕᐅᓂᖏᓪᓗ ᐃᓱᒫᓘᑎᒋᔭᐅᓯᒪᔪᑦ ᓄᖑᔪᐃᑦᑐᓂ ᐊᐅᓚᔾᔪᑎᖃᕐᓂᕐᒧᑦ.

ᒥᑭᑦᑑᑏᑦ ᓄᖑᔪᐃᑦᑐᓄᑦ ᐊᐅᓚᔾᔪᑏᑦ ᒫᓐᓇᐅᔪᖅ ᐊᐅᓚᓂᖃᖅᑐᑦ ᕕᓕᕖᓄ, ᓴᐃᐱᐅᕆᐊ (ᕌᓴᒥ). ᑎᓴᒪᓂᒃ ᐊᐅᓚᐅᑎᓂᒃ ᐆᒻᒪᖅᑯᑎᓕᐅᖅᑐᖃᓲᖅ ᓄᓇᓕᖓᓂ 4,500−ᓂᒃ ᐃᓄᖃᖅᑐᒥ.

ᐆᒻᒪᖅᑯᑎᑐᕈᓯᕐᓄᑦ ᖃᓄᖅᑑᒐᒃᓴᑦ

ᐊᓯᔾᔨᕐᓗᒋᑦ ᓇᑲᓲᔭᑐᐃᓐᓇᐃᑦ ᐅᕝᕙᓘᓐᓃᑦ ᖃᐅᒻᒪᖅᑯᑏᑦ ᐊᓂᑐᐃᓐᓇᕆᐊᓖᑦ ᐊᑯᓂᐅᓂᖅᓴᖅ-ᐊᑐᕈᓐᓇᖅᑐᓄᑦ, ᐊᑐᖖᒋᓐᓂᖅᓴᖅ-ᐊᐅᓚᔪᓐᓇᐅᑎᒥᑦ LED ᐊᓂᑐᐃᓐᓇᕆᐊᓕᖕᓄᑦ.