Rankin Inlet Energy Audits

Tuesday, September 29, 2015

ᑲᖏᖠᓂᕐᒥᑦ ᐃᒡᓗᓂᒃ ᓇᖕᒥᓂᖃᖅᑎᐅᔪᓂᒃ

 

ᐃᒡᓗᓂᒃ ᓇᖕᒥᓂᖃᖅᑎᐅᔪᓄᑦ ᑐᕌᖅᑐᖅ,

ᐱᓕᕆᖃᑕᐅᔪᒪᓇᔭᖅᐱᑦ ᐊᑭᖃᙱᑦᑐᒥᒃ ᐃᒡᓗᕕᑦ ᐆᒻᒪᖅᑯᑎᖏᑦ ᖃᐅᔨᓴᖅᑕᐅᓗᑎᒃ?

ᓄᓇᕗᒻᒥ ᐆᒻᒪᖅᑯᑎᓕᕆᔨᒃᑯᑦ ᐊᑭᖃᙱᑦᑐᓂᒃ ᖃᐅᔨᓴᑲᑕᖕᓂᐊᕐᒪᑕ 10-ᓄ ᐃᒡᓗᓂᒃ ᓇᖕᒥᓂᕆᔭᐅᔪᓂᒃ ᐃᖃᓗᖕᓂ. ᐃᓕᑕᕆᔭᐅᔾᔪᑎᑖᖅᓯᒪᔪᑦ ᐆᒻᒪᖅᑯᑎᓕᕆᔨᑦ ᐱᓕᕆᓛᕐᒪᑕ ᑕᒪᐃᓐᓂᒃ ᐃᒡᓗᓂᒃ ᓇᖕᒥᓂᖃᖅᑎᐅᔪᓂᒃ ᖃᐅᔨᓇᓱᒡᓗᑎᒃ ᐃᒡᓗᖏᑦᑕ ᐆᒻᒪᖅᑯᑎᑐᕈᓯᖏᓐᓂᒃ, ᓇᓗᓇᐃᖅᓯᖃᑎᒋᓗᓂᒋᓪᓗ ᐆᒻᒪᖅᑯᑎᑐᓗᐊᕐᓇᙱᑦᑐᓂᒃ ᐊᑐᕈᓐᓇᖅᑕᖏᓐᓂᒃ ᐊᖏᕐᕋᖏᓐᓂ.

ᖃᐅᔨᓴᖅᑕᐅᔾᔪᓰᑦ ᐃᒡᓗᓂᒃ ᓇᖕᒥᓂᖃᖅᑎᐅᔪᓂᒃ ᐃᑲᔫᑕᐅᑐᐃᓐᓇᔾᔮᙱᑦᑐᖅ, ᐃᑲᔪᕈᑕᐅᓂᐊᕐᒥᖕᒪᑦ ᓄᓇᖅᑲᑎᒌᓂᒃ ᑐᑭᓯᐊᓂᖅᓴᐅᓕᕐᓗᑎᒃ ᖃᓄᖅ ᐃᒡᓗᓕᐅᕈᓯᖃᕐᒪᖔᑕ ᖃᓄᕐᓗ ᐱᐅᓯᖅᐳᑦ ᐊᒃᑐᐃᑎᒋᓲᖑᖕᒪᖔᑦ ᐆᒻᒪᖅᑯᑎᑐᕈᓯᑦᑎᓐᓄᑦ. 

ᖃᐅᔨᓴᖅᑕᐅᓛᖅᑐᑦ ᐆᑦᑑᕝᕙ 8-ᒥ ᐆᑦᑑᕝᕙ 15-ᒧ ᑕᒪᕐᒥᒡᓗ ᖃᐅᔨᓴᖅᑕᐅᔪᑦ ᐃᑲᕐᕋᓄᑦ ᐱᖓᓱᐸᓗᖕᓄᑦ ᐊᑯᓂᐅᑎᒋᓇᔭᖅᖢᑎᑦ. ᐃᒡᓗᒥᒃ ᓇᖕᒥᓂᖃᖅᑎᐅᒍᕕᑦ ᐊᐱᖅᓱᖅᑕᐅᖃᑕᐅᔪᒪᒍᕕᓪᓗ ᐊᑭᖃᙱᑦᑐᒥᒃ ᐆᒻᒪᖅᑯᑎᑦ ᐱᔾᔪᑎᒋᓗᒋᑦ ᖃᐅᔨᓴᖅᑕᐅᖃᑕᐅᔪᒪᒍᕕᑦ, ᖃᐅᔨᒋᐊᖃᑦᑕᕈᓐᓇᖅᐳᑎᑦ ᓄᓇᕗᒻᒥ ᐆᒻᒪᖅᑯᑎᓕᕆᔨᒃᑯᑦ ᐊᒡᓚᕝᕕᖕᒥᐅᑕᓄᑦ ᐅᕗᙵᕐᓗᓯ nunavutenergy@gov.nu.ca 

ᑎᑎᕋᖃᓯᐅᑎᓂᐊᖅᐸᓯᐅᒃ ᐊᑎᖅᓯ, ᐃᒡᓗᓯ ᓈᓴᐅᑖ, ᖃᐅᔨᒋᐊᕐᕕᒃᓴᖅ ᓇᓗᓇᐃᖅᓯᒪᓗᓂ, ᐊᒻᒪ ᐃᒡᓗᐃᑦ ᓇᖕᒥᓂᕆᔭᑦ ᖃᓄᖅ ᐊᑯᓂᐅᑎᒋᔪᖅ ᐃᒡᓗᒋᓕᕐᒪᖓᑦ. ᐅᓇ ᐱᒻᒪᕆᐅᓛᖑᓪᓗᓂ, ᖃᐅᔨᑎᑕᐅᔭᕆᐊᖃᖅᐳᒍᑦ ᐃᒡᓗᐃᑦ ᓇᖕᒥᓂᕆᔭᐃᑦ ᑭᓱᕆᑦᑑᖕᒪᖔᑦ. ᐃᒡᓗᑐᐊᖑᕙ ᐃᓚᒌᒃᓯᒍᑦ ᐃᒡᓗᒋᓪᓗᓯᐅᒃ, ᒪᕐᕉᓕᖅᑲᖓᔪᒦᑉᐸ, ᐅᕝᕙᓘᓐᓃᑦ ᐃᒡᓗᓂᒃ ᑲᑎᙵᔪᒦᑉᐸ? ᐱᓇᔪᓛᖅᑐᑦ ᑭᖑᓪᓕᖅᐹᒥ ᐱᓇᔪᓛᖅᑐᑦ ᐆᑦᑑᕝᕙ 5-ᒥ 5:00-ᒧᐊᖅᐸᑦ ᐅᓐᓄᒃᓴᒃᑯᑦ ᑲᓇᓐᓇᐅᑉ ᓯᕿᖑᔭᖓ.  

ᐅᓐᓄᒃᑯᑦ ᑲᑎᒪᓯᓐᓇᖅᑎᑕᐅᓛᖅᑐᑦ ᓄᓇᓕᖕᓂ ᐃᓄᓕᒫᖅᑎᑕᐅᔪᓂᒃ ᐆᑦᑑᕝᕙ 14-ᒥ 7:00-ᒥ ᐅᓐᓄᒃᑯᑦ 9:00-ᒧᐊᖅᓴᓂᖓᓂ ᓯᓂᒃᑕᕐᕕᐅᑉ ᑐᔪᕐᒥᕕᖓᓂᑦ ᑲᑎᒪᕕᒻᒥᑦ A. ᐆᒻᒪᖅᑯᑎᓕᕆᔨᓄᑦ ᐊᖓᔪᖅᑳᕗᑦ ᒪᓂᒻᒪᐃᓂᐊᖅᑐᑦ ᑐᑭᓯᒋᐊᒐᒃᓴᑦᑎᐊᕙᖕᓂᒃ ᐆᒻᒪᖅᑯᑎᓂᒃ ᐊᑐᓗᐊᕐᓇᙱᑦᑐᓂᒃ ᐃᒡᓗᓂᒃ ᓇᖕᒥᓂᖃᖅᑎᐅᔪᓄᑦ ᐊᒻᒪᑦᑕᐅᖅ ᑐᑭᓯᒋᐊᒐᒃᓴᖅᑕᖃᕐᓗᓂ ᓯᕿᓂᕐᒧᑦ ᐆᒻᒪᖅᑯᑎᑐᕈᓯᕐᓂᒃ ᐃᒡᓗᒋᔭᐅᔪᓄᑦ.

ᓂᐅᖅᑲᒐᒃᓴᖅᑕᖃᓛᖅᑐᖅ ᑕᒧᓗᒐᒃᓴᖅᑕᖃᕐᓗᓂᓗ ᐃᓄᒃᑎᑐᓪᓗ ᑐᑭᓕᐅᕆᔨᑕᖃᕐᓗᓂ. ᐊᑭᖃᙱᑦᑐᓂᒃ ᐃᒡᓗᓄᑦ ᐆᒻᒪᖅᑯᑎᑐᓗᐊᕐᓇᙱᑦᑐᓂᒃ ᐱᑕᖃᓛᕐᒥᔪᖅ ᐊᒧᔭᐅᔪᑦ ᐱᑖᖅᐸᒡᓗᑎᒃ. ᐱᑖᕆᔭᐅᖃᑦᑕᓛᖅᑐᑦ ᐅᑯᐊ ᐆᒻᒪᖅᑯᑎᑐᓗᐊᙱᑦᑐᑦ ᖃᐅᒻᒪᖅᑯᑎᑦ, ᐆᒻᒪᖅᑯᑎᑐᓗᐊᙱᑦᑐᑦ ᖃᐅᔨᓴᐅᑎᙳᐊᑦ, ᓴᐅᕙᕐᓂᐊᕐᓗᓂ ᑯᕕᕋᔮᕐᓂᖅᓴᑦ, ᐊᓯᖏᓪᓗ ᐆᒻᒪᖅᑯᑎᑐᓗᐊᕐᓇᙱᑦᑐᑦ ᓴᖅᑭᑕᐅᕙᓪᓕᐊᔪᑦ.

ᑕᑯᓂᐊᖅᐸᓯᐅᒃ ᐊᐱᖅᑯᑎᕗᑦ ᑭᐅᔾᔪᑎᕗᓪᓗ ᐊᑖᓂ ᓇᕿᑦᑕᕆᐊᓕᖕᒥᒃ.

 

 

 

ᑐᑭᓯᒋᐊᒃᑲᓐᓂᕈᒪᒍᔅᓯ, ᐅᕙᑦᑎᓐᓄᑦ ᖃᐅᔨᒋᐊᖃᑦᑕᕈᓐᓇᖅᐳᓯ ᐅᕗᙵᕐᓗᓯ nunavutenergy@gov.nu.ca

 

ᐊᐱᖅᑯᑎᑦ

ᐆᒻᒪᖅᑯᑎᓂᒃ ᖃᐅᔨᓴᖅᑐᓂᒃ ᖃᓄᐃᓕᐅᕆᐊᖃᖅᐸᑦ?

ᓇᓗᓇᐃᒃᑯᑕᖅᑖᖅᓯᒪᔪᒥᒃ ᐆᒻᒪᖅᑯᑎᓕᕆᔨᑦ ᐊᖓᔪᖅᑳᖓᓐᓂᒃ ᐆᒻᒪᖅᑯᑎᓂᒃ ᖃᐅᔨᓴᖅᑎᐅᕗᖅ, ᒪᑯᓂᖓ ᖃᐅᔨᓴᖅᐸᒃᖢᓂ ᖃᐅᔨᓴᒐᒃᓴᑯᓘᔭᕐᓂᒃ ᖃᐅᔨᓇᓱᒃᖢᒋᑦ ᐊᖏᕐᕋᕆᔭᑉ ᐆᒻᒪᖅᑯᑎᑐᕈᓯᖏᑦ. ᖃᐅᔨᓴᖅᑎᓪᓗᒋᑦ ᐃᒪᐃᓕᐅᕐᓂᐊᕐᒥᔪᑦ ᖃᐅᔨᓴᖅᑐᕐᓗ ᐃᒡᓗᒥᓪᓗ ᓇᖕᒥᓂᖃᖅᑎᐅᔪᖅ ᑲᑎᙵᓗᑎᒃ ᐅᖃᖃᑎᒌᒃᐸᒡᓗᑎᒃ ᑎᑎᕋᖅᑕᐅᕙᓪᓕᐊᓗᑎᒡᓗ. ᖃᐅᔨᓴᖅᑎᒧᑦ ᐱᒻᒪᕆᐅᖕᒪᑦ ᐃᒡᓗᓂᒃ ᓇᖕᒥᓂᖃᖅᑎᐅᔪᑦ ᐃᓚᐅᑎᓪᓗᒋᑦ ᖃᐅᔨᓴᖅᑕᐅᔪᓂᒃ. ᖃᐅᔨᓴᖅᑕᐅᕌᓂᒃᑎᓪᓗᒋᑦ, ᐱᑎᑕᐅᓇᔭᖅᐳᑎᑦ ᐅᓂᒃᑳᒥᒃ ᐱᑖᕆᓂᐊᖅᑕᕐᓂᒃ.

ᖃᓄᖅ ᐊᑯᓂᐅᑎᒋᔪᖅ ᖃᐅᔨᓴᕋᔭᕐᒪᑕ?

ᖃᐅᔨᓴᕋᔭᖅᑐᑦ ᐃᒻᒪᖄ ᐱᖓᓱᓄᑦ ᐃᑲᕐᕋᓄᑦ. ᐱᒻᒪᕆᐅᓛᖑᖃᑕᐅᓪᓗᓂ ᖃᐅᔨᓴᖅᑕᐅᖃᑕᐅᓂᐊᕐᒥᔪᖅ ᐃᒡᓗᒋᔭᐅᔪᑦ ᖃᐅᔨᓴᖅᑕᐅᓗᑎᒃ ᐊᓂᖅᓵᖅᑐᕐᕕᖓ ᖃᓄᖅ ᐊᓂᖅᓵᖅᑐᑦᑎᐊᕐᓇᖅᑎᒋᖕᒪᖔᑦ ᐊᑐᖅᖢᑎᒃ ᐋᖅᑭᒃᑕᐅᓯᒪᔪᓂᒃ ᖃᐅᔨᓴᕈᑎᓂᒃ ᐊᖏᕐᕋᕆᔭᐅᔪᒧᑦ ᖃᐅᔨᓴᕈᑎᓂᒃ ᐊᓂᖅᓵᖅᑐᕐᓇᕐᓂᖓ ᖃᓄᐃᑦᑑᖕᒪᖔᑦ. ᐃᒡᓗᓂᒃ ᓇᖕᒥᓂᖃᖅᑎᐅᔪᑦ ᑐᙵᓱᒃᑎᑕᐅᕗᑦ ᐊᐃᓯᒪᔪᓐᓇᖅᑎᑕᐅᓪᓗᑎᒃ ᖃᐅᔨᓴᖅᑕᐅᑎᓪᓗᒍ ᐃᒡᓗᐊ. ᖃᐅᔨᓴᖅᑕᐅᓂᐊᕐᒥᔪᑦ, ᖃᐅᔨᒪᔨᑕᖅ ᖃᐅᔨᓴᕐᓂᐊᕐᒥᔪᖅ ᐃᒡᓗᒥᐅᑕᓂᒃ ᑲᐳᔾᔭᖅᑐᓅᖅᑐᓂᒃ ᐊᐅᓚᔪᓐᓇᐅᑎᓗᒃᑖᓪᓗ ᖃᐅᔨᓴᕐᓗᒋᓂᒋᑦ, ᑕᑯᔪᒪᑐᐃᓐᓇᕆᐊᖃᖅᖢᓂᓗ ᐆᒻᒪᖅᑯᑎᓄᑦ ᐊᑭᓕᖅᓲᑎᖕᓂᒃ ᖃᐅᔨᔪᒪᓪᓗᓂᒋᑦ ᖃᓄᖅ ᐆᒻᒪᖅᑯᑎᑐᖅᑎᒋᖕᒪᖔᖅᐱᑦ ᐃᒡᓗᒋᔭᑦ ᖃᐅᔨᑦᑎᐊᕐᓂᖅᓴᐅᔪᒪᓪᓗᓂᐅᒃ ᖃᓄᐃᒻᒪᖔᑦ. 

ᑭᒃᑯᑦ ᖃᐅᔨᓴᓛᕐᒪᑕ?

ᐆᒻᒪᖅᑯᑎᓕᕆᔨᒃᑯᑦ ᐊᖓᔪᖅᑳᖏᑦ ᐅᑭᐅᖅᑕᖅᑐᒥ ᐆᒻᒪᖅᑯᑎᓕᕆᔨᒃᑯᓐᓂᙶᖅᑐᑦ (AEA) ᖃᐅᔨᓴᓛᖅᑐᑦ. ᐅᑭᐅᖅᑕᖅᑐᒥ ᐆᒻᒪᖅᑯᑎᓕᕆᔨᒃᑯᑦ ᐃᓄᖕᓄᑦ ᑐᑦᑕᕐᕕᒋᔭᐅᕗᖅ ᔭᓗᓇᐃᒥ ᖃᐅᔨᓴᕐᕕᐅᓪᓗᓂ ᐱᒃᑯᓇᖅᓯᑎᑦᑎᔨᐅᓪᓗᑎᒡᓗ ᐆᒻᒪᖅᑯᑎᓂᒃ ᐊᑐᓗᐊᕐᓇᙱᑦᑐᓂᒃ ᖃᓄᖅᑑᖃᑦᑕᕆᐊᓕᖕᓂᒃ. ᐅᑭᐅᖅᑕᖅᑐᒥ ᐆᒻᒪᖅᑯᑎᓕᕆᔨᒃᑯᑦ ᐊᒻᒪ ᓄᓇᕗᒻᒥ ᐆᒻᒪᖅᑯᑎᓕᕆᔨᒃᑯᑦ ᐊᒡᓚᓇᕝᕕᖕᒥᐅᑕᑦ ᐱᓕᕆᖃᑎᒌᓕᓚᐅᕐᒪᑕ ᐆᒻᒪᖅᑯᑎᑐᕈᑎᑦᑎᐊᕙᖕᓂᒃ ᐱᔨᑦᑎᕋᕈᑎᒃᓴᓂᒃ ᓴᖅᑭᑎᕆᓇᓱᒃᖢᑎᑦ ᓄᓇᕗᒥᐅᓄᑦ.

ᖃᓄᐃᓕᓛᕐᒪᑕᓕ ᑐᑭᓯᒋᐊᕈᑎᑦ ᖃᐅᔨᓴᖅᑎᓪᓗᒋᑦ ᐱᔭᐅᓚᐅᖅᑐᑦ?

ᑕᒪᕐᒥᒃ ᐅᑭᐅᖅᑕᖅᑐᒥ ᐆᒻᒪᖅᑯᑎᓕᕆᔨᒃᑯᑦ ᐊᒻᒪ ᓄᓇᕗᑦ ᒐᕙᒪᒃᑯᑦ ᖃᓄᑐᐃᓐᓇᖅ ᖃᐅᔨᔭᐅᕈᓘᔭᕆᐊᖃᙱᓐᓃᑦ ᑲᒪᒋᔭᐅᑦᑎᐊᖅᑐᑦ. ᐅᑯᓄᖓ ᐱᔾᔪᑎᓄᑦ ᑐᕋᖓᑎᑕᐅᖃᑦᑕᕐᓂᐊᖅᑐᑦ ᐱᐅᓂᖅᐹᒃᑯᑦ ᐊᒻᒪ ᑐᑭᓯᒋᐊᖅᑕᐅᔪᑦ ᑲᑎᖅᓱᕐᓗᒋᑦ, ᐊᑎᓕᐅᕆᐊᖃᕋᔭᖅᐳᑎᓪᓗ ᐊᑎᓕᐅᕆᐊᓕᖕᒥᒃ ᐊᖏᕈᑎᒥᒃ ᐱᕕᖃᕈᑎᒃᓴᒥᒃ ᑐᑭᓯᒋᐊᕈᑎᓂᒃ ᖃᐅᔨᓴᕐᕕᐅᑎᓪᓗᑎᑦ ᐱᔭᐅᔪᓐᓇᖅᓯᓗᑎᒡᓗ ᓄᓇᒥᐅᑕᓕᕆᔨᓂᒃ ᑲᓇᑕᒥ, ᑲᓇᑕᒥ ᒥᓂᔅᑕᕆᔭᐅᔪᖅ ᐆᒻᒪᖅᑯᑎᓕᕆᔨᓄᑦ. ᓄᓇᕗᑦ ᒐᕙᒪᒃᑯᑦ ᐱᑎᑕᐅᓂᐊᕐᒥᔪᑦ ᓇᐃᒡᓕᒋᐊᖅᓯᒪᔪᓂᒃ ᐅᓂᒃᑳᓂᒃ ᖃᐅᔨᓴᖅᑎᓂᙶᖅᑐᓂᒃ ᖃᐅᔨᓴᓚᐅᖅᑕᖏᑦ ᓇᓗᓇᐃᖅᓯᒪᑦᑎᐊᕐᓗᑎᒃ. ᑖᓐᓇ ᐅᓂᒃᑳᖅ ᑕᑯᔭᐅᔪᓐᓇᓛᕐᒥᔪᖅ ᐃᖃᓗᖕᓂ ᓄᓇᓕᐸᐅᔭᕐᒥ, ᐆᒻᒪᖅᑯᑎᓕᕆᔨᒃᑯᑦ ᐱᓕᕆᔨᐅᖃᑎᒋᔭᕗᑦ. ᐃᓕᖕᓅᖓᔪᑦ ᑐᑭᓯᒋᐊᕈᑎᑦ ᑭᒃᑯᑐᐃᓐᓇᓄᑦ ᖃᐅᔨᔭᕆᐊᖃᙱᑦᑐᓄᑦ ᑕᑯᖅᑯᔾᔭᐅᖃᑦᑕᔾᔮᙱᑦᑐᑦ.

ᑭᒃᑯᓐᓄᑦ ᐃᑲᔫᑕᐅᓂᐊᕐᒪᑦ?

ᖁᓕᓄᑦ ᐃᒡᓗᓂᒃ ᓇᖕᒥᓂᖃᖅᑎᐅᔪᓄᑦ ᐃᑲᔫᑕᐅᑦᑎᐊᕐᓂᐊᖅᑐᑦ ᖃᐅᔨᓴᖅᑕᐅᔾᔪᑎᒥᑎᒍᑦ ᐅᓂᒃᑳᓕᐊᖑᓂᖓᑎᒍᓪᓗ ᑲᖏᖠᓂᕐᒥᑦ. ᓄᓇᓖᑦ ᐃᑲᔪᖅᑕᐅᓂᐊᖅᐳᑦ ᑐᑭᓯᐊᓂᖅᓴᐅᓕᕐᓗᑎᒃ ᐆᒻᒪᖅᑯᑎᑐᕈᓯᕐᓂᒃ ᐃᒡᓗᓂᒃ ᓇᖕᒥᓂᕆᔭᖏᓐᓂᒃ. ᑖᒃᑯᐊ ᑐᑭᓯᒋᐊᒐᒃᓴᑦ ᐃᑲᔫᑕᐅᓂᐊᕐᒥᔪᑦ ᐃᓱᒪᓕᐅᕆᔨᓪᓚᕆᖕᓄᑦ ᓲᕐᓗ ᓄᓇᕗᒻᒥᑦ ᐃᓪᓗᓕᕆᔨᕐᔪᐊᒃᑯᑦ  ᐊᒻᒪ ᓴᖅᑭᔮᖅᑎᑦᑎᓂᖓ ᐆᒻᒪᖅᑯᑎᓂᒃ ᐊᑭᑐᓗᐊᙱᑦᑐᓂᒃ ᐊᑐᐊᒐᒃᓴᖅᑕᖃᓕᕐᓗᓂ ᐋᖅᑭᒃᑕᐅᓯᒪᔪᓂᒃ ᐊᑐᖅᑕᐅᔾᔪᓯᖏᓐᓂᒡᓗ ᓯᕗᕚᒃᓴᑦᑎᓐᓄᑦ.

ᐅᓐᓄᒃᑯᑦ ᑲᑎᒪᑎᑦᑎᓚᐅᑲᖕᓂᖅ ᑭᒃᑯᓕᒫᓄᑦ ᒪᖅᐱᓯᒪᓗᓂ ᓄᓇᓕᖕᓂ ᐊᑭᖃᙱᑦᑐᓂᒡᓗ ᐃᒡᓗᓄᑦ ᐊᖏᕐᕋᕆᔭᓄᑦ ᐆᒻᒪᖅᑯᑎᑐᓗᐊᕐᓇᙱᑦᑐᓂᒃ ᐱᑖᒐᒃᓴᖅᑕᖃᕋᔭᖅᖢᓂ ᐅᔾᔨᕆᔭᐅᓕᖅᑎᒃᑲᓐᓂᕈᑎᒃᓴᓂᒃ ᐱᓕᕆᐊᒃᓴᓂᒡᓗ ᐃᒡᓗᓂᒃ ᓇᖕᒥᓂᖃᖅᑎᐅᔪᓂᒃ ᐊᑐᖅᑕᐅᔪᓐᓇᖅᑐᓂᒃ ᐆᒻᒪᖅᑯᑎᑐᕈᓯᖏᓐᓄᑦ ᒥᒃᖠᒋᐊᕈᑎᒃᓴᑦ.

ᐃᒡᓗᐃᓪᓕ ᖃᓄᖅ ᓂᕈᐊᖅᑕᐅᓂᐊᕐᒪᑕ?

ᐃᓚᖓᑦ ᑐᕌᒐᕆᔭᐅᔪᖅ ᖃᐅᔨᓴᖅᑎᓄᑦ ᐃᑲᔪᕈᒪᓪᓗᑎᒃ ᓴᖅᑭᑦᑎᓇᓱᒃᑎᓪᓗᒋᑦ ᓄᓇᓕᖕᓂ ᐆᒻᒪᖅᑯᑎᑐᕈᓯᕐᓂᒃ ᐃᖃᓗᖕᒥᐅᓄᑦ. ᐊᒥᓱᓂᒃ ᐱᔭᒃᓴᖅᑕᖃᐅᕐᒪᑦ ᐃᓚᓕᐅᔾᔭᐅᓪᓗᑎᒃ ᓄᒃᑕᕈᓰᑦ, ᐆᒻᒪᖅᑯᑎᓄᑦ ᐊᐅᓚᔪᓐᓇᐅᑎᑖᕈᑎᑦ, ᐃᒡᓗᐃᓪᓗ. ᖁᓕᑦ ᖃᐅᔨᓴᖅᑕᕗᑦ, ᐃᑲᔫᑎᒋᔪᓐᓇᕐᓂᐊᕋᑦᑎᒍᑦ ᑐᑭᓯᐅᒪᖃᑎᒌᖕᓂᖅᓴᐅᓕᕐᓗᑕ ᐆᒻᒪᖅᑯᑎᑐᕈᓯᕐᓂᒃ.

ᑕᒪᓐᓇ ᑐᑭᖃᖅᐳᖅ ᐱᓕᕆᖃᑎᒌᒍᒪᓂᑦᑎᓐᓂᒃ ᕿᓂᖅᑐᒍᑦ ᐃᒡᓗᓂᒃ ᓇᖕᒥᓂᕆᔭᐅᔪᓂᒃ ᖃᓄᐃᓕᖓᓂᖏᑦ ᐊᔾᔨᒌᙱᑦᑕᑦᑎᐊᖅᑐᓂᒃ, ᐃᓚᒋᔭᐅᓪᓗᑎᒃ ᐃᒡᓗᐃᑦ ᓄᑕᐅᙱᑦᑐᑦ ᓄᑖᓪᓗ, ᐊᔾᔨᒌᙱᑦᑐᓂᒡᓗ ᐃᒡᓗᓂᒃ ᐃᒡᓗᑐᐊᓂᒡᓗ ᐃᓚᒌᓄᑦ ᐃᒡᓗᒋᔭᐅᔪᓂᒃ, ᒪᕐᕉᓕᖅᑲᖓᔪᓃᑦᑐᑦ, ᐊᒻᒪ ᐃᒡᓗᓂᒃ ᑲᑎᙵᔪᓃᑦᑐᑦ. ᐅᔾᔨᖅᓱᑦᑎᐊᕐᓗᑕ ᓂᕈᐊᕆᐊᖃᕐᓂᐊᕋᑦᑕ ᐊᖏᕐᕋᕆᔭᓂᒃ ᓄᓇᓕᖕᓂ ᐃᑲᔫᑕᐅᔪᓐᓇᕐᓗᓂ ᑐᑭᓯᐊᓂᖅᓴᐅᓕᕐᓗᒍ ᐆᒻᒪᖅᑯᑎᓕᕆᓂᖅ ᐊᑕᖏᖅᖢᒍ ᐱᓕᕆᐊᖑᓕᓲᑦ.

ᐱᓇᔪᖕᓂᐊᖅᑐᑦ ᑲᑎᖅᓱᖅᑕᐅᓂᐊᖅᑐᑦ ᓄᓇᖃᕐᕕᖏᑦ ᒪᓕᒃᑕᐅᖅᑳᕐᓗᑎᒃ ᐋᖅᑭᒃᓱᖅᑕᐅᓚᐅᕐᓗᑎᒃ, ᐋᖅᑭᒃᓱᐊᓂᒃᓯᒪᓕᖅᐸᑕ ᐊᑎᕐᓂᒃ ᐊᒧᓯᖃᑦᑕᓛᖅᑐᒍᑦ. ᑕᐃᒪᐃᓕᐅᕈᑦᑕ ᓇᓗᓇᔾᔮᙱᒻᒪᑦ ᓂᕈᐊᕈᓐᓇᕐᓂᑦᑎᓐᓂ ᐊᖏᕐᕋᕆᔭᓂᒃ ᓄᓇᓕᖕᓃᖃᑕᐅᔪᓂᒃ ᖃᐅᔨᒪᓇᓲᔮᕐᔪᒡᓗᑕᓗ ᖃᓄᐃᓕᐅᕆᐊᖃᓯᑳᓪᓚᖕᓂᕈᑦᑕᓘᓐᓃᑦ ᐅᐸᓗᖓᐃᔭᐅᑎᒃᓴᓂᒃ.

ᖃᓄᐃᒻᒪᑦ ᑲᖏᖠᓂᕐᒥᑦ, ᖃᓄᐃᒻᒪᓪᓗ ᐃᒡᓗᓂᒃ ᑭᓯᐊᓂ ᓇᖕᒥᓂᖃᖅᑎᓄᑐᐊᑦ, ᐊᒻᒪ ᖃᓄᐃᒻᒪ ᖁᓖᓐᓇᑯᓗᐃᑦ ᐃᒡᓗᐃᖅ?

ᐆᒻᒪᖅᑯᑎᖃᕐᓂᖅ ᐊᒃᑐᐃᔾᔪᑕᐅᓲᖑᖕᒪᑦ ᐱᑖᖃᑕᐅᓯᒪᔪᓄᑦ ᐱᓕᕆᔾᔪᑎᓄᓪᓗ ᓄᓇᑦᑎᓐᓂ. ᒐᕙᒪᒃᑯᓐᓄᑦ ᑐᑦᑕᕐᕖᑦ ᐱᓕᕆᕙᒌᓕᖅᑐᑦ ᐆᒻᒪᖅᑯᑎᑐᓗᐊᕐᓇᙱᑦᑐᓂᒃ ᓴᖅᑭᑎᕆᓪᓗᑎᒃ ᐱᓕᕆᐊᖏᓐᓂᒃ ᐱᔨᑦᑎᕋᐅᑎᖏᓐᓂᒡᓗ. ᖃᐅᔨᓴᑦᑎᐊᕐᓗᒋᑦ ᐃᒡᓗᓂᒃ ᓇᖕᒥᓂᕆᔭᐅᔪᑦ, ᐃᑲᔪᕈᓐᓇᕋᑦᑎᒍᑦ ᐅᔾᔨᕈᓱᓕᖅᑎᑉᐹᓪᓕᕐᓗᑎᒍᑦ ᐃᓚᐅᑎᓕᕐᓗᑎᒍᓪᓗ ᐃᒡᓗᓂᒃ ᓇᖕᒥᓂᖃᖅᑎᐅᖃᑎᖏᓐᓂᒃ ᐆᒻᒪᖅᑯᑎᓕᕆᔾᔪᑎᒋᓇᓱᒃᑕᑦᑎᓐᓄᑦ ᑎᑭᐅᑎᓇᓱᒃᑎᓪᓗᑕ. ᐃᖃᓗᖕᓂ ᐃᒡᓗᓂᒃ ᓇᖕᒥᓂᖃᖅᑏᑦ ᐅᓄᓛᖑᖕᒪᑕ ᐊᒻᒪ ᐃᖃᓗᖕᓂ ᓄᓇᓕᕋᐅᔭᕐᒥ ᐸᕐᓇᐃᕙᓪᓕᐊᖕᒪᑕ ᑭᖑᓪᓕᕐᒥ ᐃᒡᓗᓂᒃ ᓴᖅᑭᓛᖅᑐᒃᓴᓂᒃ. ᑐᑭᓯᒋᐊᒐᒃᓴᑦ ᑲᑎᖅᓱᖅᑕᐅᔪᑦ ᖃᐅᔨᓴᖅᑕᐅᔪᓂᒃ ᐃᑲᔪᕈᓐᓇᕋᔭᕐᒪᑕ ᓄᓇᓕᐸᐅᔭᕐᒥ ᐊᑐᓕᖅᑎᑦᑐᓐᓇᕐᓗᒋᑦ ᐊᑐᐊᒐᒃᓴᓂᒃ ᐋᖅᑭᒃᑕᐅᓯᒪᔪᓂᒃ ᓯᕗᓂᒃᓴᒥ ᐃᒡᓘᔪᒫᖅᑐᓄᑦ. ᐊᐅᓚᒐᕐᓂᖅᑐᓂᒃ ᐆᒻᒪᖅᑯᑎᓄᑦ ᐊᑐᐊᒐᑦ ᐋᖅᑭᒃᑕᐅᓯᒪᔪᑦ ᑖᒃᑯᓄᖓᓕᒫᖅ ᐃᒡᓗᓄᑦ ᓇᖕᒥᓂᕆᔭᐅᔪᑦ ᐊᔾᔨᒌᙱᑦᑑᑎᑦ ᑕᐃᒫᑦᑎᐊᖅ ᑐᑭᖃᕈᓐᓇᕐᒪᑦ ᐅᓄᖅᑐᕐᔪᐊᒻᒪᕆᐊᓗᐃᑦ ᕼᐊᓐᓇᓚᖏᓐᓂᒃ ᐃᒡᓗᓕᐅᕈᓐᓇᓛᕐᒪᑕ ᓯᕗᓂᒃᓴᑦᑎᓐᓂ ᐆᒻᒪᖅᑯᑎᑐᓗᐊᙱᓐᓂᖅᓴᓕᐊᕆᓯᒪᓗᑎᒃ.

ᐱᓕᕆᐊᒧᑦ ᑮᓇᐅᔭᑦ ᑭᒡᓕᖃᔭᒻᒪᑕ ᖃᐅᔨᓴᖅᑕᐅᔾᔪᑎᓄᑦ ᑕᒪᑐᒪᓂ ᐊᕐᕌᒍᒥ ᖁᓖᓐᓇᕐᓂᒃ ᐃᒡᓗᓂᒃ ᓇᖕᒥᓂᕆᔭᐅᔪᓂᒃ ᖃᐅᔨᓴᕈᓐᓇᕐᓂᐊᖅᑐᒍᑦ. ᓄᓇᕗᒻᒥ ᐆᒻᒪᖅᑯᑎᓕᕆᔨᒃᑯᑦ ᐊᒡᓚᕝᕕᓕᕆᔨᖏᑦ ᖃᖓᑦᑎᐊᖅ ᖃᐅᔨᓴᓵᓚᐅᕐᒪᑕ ᐊᕐᕕᐊᑦ ᕼᐋᒻᒪᓚᖓᓐᓂᒃ ᐃᓚᓕᐅᔾᔭᐅᓪᓗᑎᒃ ᑮᓇᐅᔾᔭᒃᓴᓇᓱᐊᖅᑐᑦ ᓯᕗᓪᓕᖅᐹᒥ ᐱᓕᕆᐊᖑᔪᑦ ᐃᖃᓗᖕᓂ. ᐅᑭᐅᖅᑕᖅᑐᒥ ᐆᒻᒪᖅᑯᑎᓕᕆᔨᒃᑯᑦ ᐱᓕᕆᖃᑎᒋᔭᐅᑎᓪᓗᒋᑦ, ᓄᓇᕗᒻᒥ ᐆᒻᒪᖅᑯᑎᓕᕆᔨᒃᑯᑦ ᐊᒡᓚᕝᕕᒻᒥᐅᑕᖏᑦ ᐃᓚᐅᑎᑦᑏᓐᓇᖃᑦᑕᕐᓂᐊᖅᐳᑦ ᐆᒻᒪᖅᑯᑎᓕᕆᔨᓂᒃ ᓯᕗᓂᒃᓴᑦᑎᓐᓂ ᖃᐅᔨᓴᕐᓂᐅᖃᑦᑕᓛᖅᑐᓂᒃ.

ᐆᒻᒪᖅᑯᑎᑐᕈᓯᕐᓄᑦ ᖃᓄᖅᑑᒐᒃᓴᑦ

ᐃᓕᓯᓗᑎᑦ ᕿᓪᓕᖅᑑᔭᓂᑦ ᓯᓚᑖᓃᓐᓂᖅᓴᓄᑦ ᐹᓄᑦ ᐊᒻᒪᓗ ᐃᒐᓛᓄᑦ ᐊᓯᐅᔨᖁᓇᒃ ᐅᖅᑰᓂᖓᓂᑦ ᐊᖏᕐᕋᕐᓂᒃ.